Shillong, K’Lyngkot 03
Ka Jylla ka dang ïai pynkhreh ban pynlong ïa ka National Games ha kaba sdang jong u snem 2027 bad na ka liang ka Meghalaya State Olympic Association (MSOA) ka la thmu ban pynlong ïa kane ka lympung kaba heh hapoh ka ri ha u bnai Rymphang lane u Lber.
U President ka MSOA, Bah John F Kharshiing, u la pynpaw ba ka Jylla ka khmih lynti ban pyndep ïa baroh ki jingdonkam ha kaba ïadei bad ki nongthied ïa ki jaka ïalehkai ha kaba kut jong mynta u snem 2025 lane lada slem ruh kam dei ban palat ïa u Lber jong u snem 2026, khnang ban pynthikna ba katei ka lympung kan long ba la pynkhreh na ka bynta katei ka lympung.
Te kumta ka sorkar ka la rai ban ïakren thikna bad ka Indian Olympic Association (IOA) khnang ba ngin pynkhreh ban pynlong ïa ka National Games ha u snem 2027, la pynpaw u Bah Kharshiing.
Ha ka jingïahap bad kane ka jingthmu, na ka liang u Myntri ka tnad ïalehkai ka Sorkar Jylla, Bah Shakliar Warjri, u la phah da ka jingthoh sha u Myntri ka tnat ïalehkai jong ka sorkar pdeng u Mansukh Mandaviya, ban pyntip sha u halor ka rai jong ka Jylla ban pynlong ïa kane ka lympung ïalehkai kaba heh jong ka ri ha u 2027.
U Bah Kharshiing u la ban jur ruh ïa ka jingshimkhia ka MSOA ban pynurlong ïa kane ka thong ba kongsan hapoh ki ar snem ban wan.
Haba phai dien halor ka jingïateh soskular ba la ïasoi ha u snem 2018 hapdeng ka sorkar jylla bad ka IOA, u la pynkynmaw ba ka jylla ka la dep buh ïa ka thong ban ïoh pynlong ïa katei ka lympung kaba don haduh 36 tylli ki jait jingïalehkai ha ka National Games.
Dangshen la khot ïa ka jingïalang bishar bniah ba la pynïaid da u Myntri Rangbah ka Jylla u Conrad K Sangma ban bishar bniah ïa ka jingïaid shaphrang jong ki projek jong ki jaka ïalehkai kiba donkam bha khnang ban lah ban pynlong ïa ka lympung ïalehkai.
Ha katei ka jingïalang la ïohi ïa ka jingïashim bynta na ki heh ophisar sorkar, ba kynthup ïa u Vijay Kumar, Commissioner and Secretary ka tnad ïalehkai, nalor ki nongmihkhmat jong ka MSOA.
Namar kata, la khmih lynti ba na ka liang ka Sorkar Jylla lem bad ki nongïalam ka MSOA kin sa shong biang ïa ki jingïalang na ka bynta ban bishar bniah khnang ban long ba la khreh shwa ban sdang katei ka lympung.
