Shillong, K’Lyngkot 05
Ka Momentum bad ka Lagan 2.O ki la ïoh jingjop ha ka Third Division Cricket League 2024-25 ba la pynïaid da ka Shillong Sports Asso-ciation ha ka Sngi U Blei.
Ha kane ka jingïakhun kaba la long ha madan Urkaliar, Shillong, ka Momentum ka la pynliem noh ïa ka Mawjam da 3 wiket. Ka Mawjam ka la kam trai ban tied nyngkong ha kaba ka la ïoh 148 run bad shah pynkhyllem 7 wiket ha ki 20 over. U Sahil u la tied 32 run na ki 22 bol bad u Aman u la ïoh 26 run na ki 24 bol. Katba u Hamid u la shim 3 wiket bad shi wiket la shim da u Wansuklang.
Haba wan shimti ïa ka pali ba ar, ka Momentum ka la lah ban kynjoh sha ka thong da kaba ïoh 150 run bad shah pynkhyllem 7 wiket ha ki 19.4 over. U Eddison u la tied 36 run na ki 25 bol bad u Jerrymaïa u la ïoh 23 run na ki 16 bol. Katba u Mustafa u la shim 4 wiket bad 2 wiket da u Abrar. Ïa ka nam Player of the Match la ïoh da u Hamid.
Haba phai sha ka jingïakhun ba ar, ka Lagan 2.O ka la jop da 155 run ïa ka LMYA. Ka Lagan 2.O kaba la kam trai ban tied nyngkong ka la ïoh 228 run bad shah pynhap 7 wiket ha ki 20 over. U Subhash u la tied 56 run na ki 30 bol bad u Aman u la ïoh 45 run na ki 28 bol. Katba u Pankaj u la shim 4 wiket bad shi wiket da u Tanmay.
Haba wan beh ïa ka thong, ka LMYA ka la ïoh tang 73 run hadien ba ka la shah pynkhyllem baroh wiket ha ki 12.4 over. U Sagar u la tied 25 run na ki 26 bol bad u Saurab u la ïoh 12 run na ki 7 bol. Katba u Rohit bad u Subhash ki la shim 3 bad 2 wiket. Ïa ka nam Player of the Match la ïoh pdiang da u Subhash.
