UK, Kyllalyngkot:
Katkum ki khubor, la ong ba ki pulit ka West Midlands ha Britain, ki la lap khatduh ia ka mukotduma jong kawei ka kynthei kaba la jah rngai la 52 snem mynshwa hadien ba ki la ioh ban pynmih ia ka dur jong ka kaba byrngut lane ha ka ktien nongwei kaba ki ong kaba ‘blur’. Katei ka longkmie, kaba kyrteng ka Sheila Fox, ka la jah rngai na Coventry naduh u snem 1972, mynba ka dang don tang 16 snem ka rta. Hynrei la ong ba namar ki bor pyniaid kim shym la lah ban wad ne bud-dien ia ka da ki phew snem bad kumta la ong ba kane ka long kawei na ki case, kaba la slem tam jong kiba la jah rngai ha katei ka ri.
Kaba kham kongsan ka long ba ha ka por ba ka Fox ka la jah rngai, ka dang shong- sah lang bad ki kmie ki kpa jong ka hi. Ki la don ki jingkynnoh ba ka lah ban dei ba ka la leit phet bad uwei u briew uba ka don jingiadei bad u ba la kham rangbah ka rta. Hynrei ym don kano kano ka sakhi kaba shai ka ban pynshisha ia katei ka jingkynnoh kaba la pynlong ia ka jingjah jong ka kum ka jingsneng ia kiba bun ki samla kynthei ha katei ka por.
Hynrei, ha kane ka sien pat, la ong ba ki pulit ki la lah ban shem biang ia ka hadien ba ki la plied biang ia ki kot- ki sla bad ki mukotduma ba la ujor da ki bahaiing halor ka jingjah rngai jongka naduh utei u snem, bad ha katei ka mukotduma ba la leit ujor da ki bahaiing ha katei ka por, ki pulit ki la lap ruh ia ka dur jong ka Fox mynba ka dang don 16 snem ka rta, ha kaba ki pulit ki la pyllait bad pynsaphriang ia katei ka dur jongka ha baroh ki rynsan ‘Social Media’ bad kaba la pynlong ia ki paidbah ba kin iohi ia katei ka dur bad kiba don jingithuh ia katei ka briew ba kin pyntip sha ki pulit halor ka jaka ba katei ka briew ka don.
Haba iadei bad kane, la ong ba na ka liang jong katei ka tnat pulit, ki heh pulit ki la pynpaw ka jingsngewkmen kaba khraw ba ki la lah ban shem biang ia katei ka longkmie kaba la jah rngai mynta la 50 snem tam bad ki kyrmen ruh ba kane ka long ka nuksa ia ka tnat pulit jong kiwei ruh ki jaka ba ki dei ban bud-dien ia baroh ki mukotduma ba la leit ban ujor da ki paidbah ha ka por kaba biang. Khnang ba kin lah ban shem pat ia kito kiba la jah rngai lane kiba la poi sakma na ki bahaiing-bahasem khlem ka jingiatip lem ha iing.
