Shillong, K’lyngkot 06
Ka Meghalaya ka la shah rem noh da 2 ron ha ka Jammu and Kashmir ha ka lympung ïalehkai U-23 Women’s T20 Trophy 2024-25 ha ka Lah Sngi U Blei ha Jagiroad, Assam.
Ka jingïakhun ha kane ka sngi ka la long kaba ïakhaid bha ha kaba ka J&K ka la ïoh 95 run bad shah pynhap 6 wiket ha ki 20 over. Ka Meghalaya haba wan beh ïa ka thong ka la ïoh 93 run bad shah pynhap 7 wiket ha ki 20 over.
Ka Meghalaya ka la hap noh ar wiket ha ka over ba nyngkong, hynrei ka Rubi Chettri bad ka Ankita Sharma ki la lah ban ïalehkai bha na ka bynta ban kynjoh sha 49 run ha ka wiket ba lai. Ka Ankita ka la ïoh 11 run na ka 26 bol, katba ka Rubi ka la ïoh 28 run na ka 59 bol na ka bynta ka Meghalaya. Ka Mansi Anand ka la ïoh 18 run na ki 17 bol na ka bynta ban bynrap run shuh ïa ka Meghalaya hynrei ka jingduh noh jong katto katne ki wiket ha kaba kut jong ka jingïalehkai ka la pynlong ban shah rem.
Kham ha shwa, ka J&K ka la lah ban ïalehkai bad shah pynhap tang shi wiket ha ki 17.5 over, hynrei sa san tylli ki wiket ha kaba ka la pynlong ba kan ym lah ban kynjoh sha ki 100 run. Ka Suruti Kumari Ray ka la shim 2/11 ha ki 3 over bad ka Rubi (1/11) ha ki 4 over. Ka nongtied ba kynsai ka J&K ka dei ka Sheena Saraf (31) kaba la shah pynkhyllem noh ha ka Ritreki Pohshna.
Ha ka jingïalehkai ha ka Sngi U Blei, ka Meghalaya ka la shah rem ha ka Jharkhand da 9 wiket. Kumta, ka Meghalaya kan pynkhreh biang ïa ka jingïakhun ha ka Sngi Balang pyrshah ïa ka Gujarat ha Guwahati.
