Jowai, K’lyngkot 06
Ka Wahshangiar bad Phlongingkhaw ki la ïoh jingjop, katba ka Umjlasiaw bad ka Lumshyrtoh ki la ïasam mar shi point ha ka lympung ïalehkai Thadlaskeiñ Football League ba la pynïaid da ka Thadlaskeiñ Sports Association (TSA) ha ka Lah Sngi U Blei ha Wahiajer Stadium.
Ha ka jingïakhun kaba nyngkong, ka Wahshangiar ka la pynliem noh ïa ka Lumkynsaw da 1-0 kol bad kane ka la wan urlong lyngba ka shi kol ba la thep da u Pynskhemlang Muktieh ha ka minit kaba 70.
Ha ka jingïalehkai kaba bud, ka Phlongingkhaw ka la pynjem khnap ïa ka Nongthymme Nongdhar haduh 6-0 kol. U Philemon Suting (16 & 53) bad u Dameki Suting (25 & 30) ki la thep mar ar kol, katba ïa ki shi kol la thep da u Juhki Suting (1) bad u Vincent Suting (27).
Haba phai sha kawei pat ka jingïakhun hapdeng ka Umjlasiaw bad ka Lumshyrtoh kim shym la lah ban thep kol haduh kaba kut ka jingïalehkai.
Ka jingïalehkai ha ka sngi Ba-ar kan long hapdeng ka Ryntih Mynsngat pyrshah ïa ka Madur ha ka por 10 baje mynstep, ka Mukhla Veteran ïa ka Nartiang ha ka por 12 baje mynsngi bad ka Grounded ïa ka Onfroy United ha ka por 2 baje nohphai sngi.
