Jowai, K’lyngkot 07
Ka Madur bad Ryntih Mynsngat ki la ïasam mar shi poiñ, katba ka Nartiang bad Grounded FC ki la ïoh jingjop ha ka lympung ïalehkai Thadlaskeiñ Football League ba la pynïaid da ka Thadlaskeiñ Sports Association (TSA) ha ka Sngi Ba-ar ha Stadium Wahïajer.
Ha ka jingïakhun kaba nyngkong, ka Madur bad ka Ryntih Mynsngat ki la ïakhaid mar 1-1 kol. Tang mar ïa sdang ka jingïalehkai ka Madur ka la ïoh ban pynkhih jar nyngkong eh ha ka minit kaba 6 lyngba u Riang Laloo, hynrei hadien shiteng kynta ka Ryntih Mynsngat ka la lah ban pynphai kylla ha ka minit 39 lyngba u Ryntih Shylla.
Ha ka jingïalehkai kaba bud, ka Nartiang ka la pynliem noh ïa ka Mukhla Veteran da 2-0 kol. Kane ka la wan urlong lyngba u Pynkhap Law uba la thep ha ka minit kaba 38 bad u Pynïohlad Bhoi ha ka minit 68.
Haba phai sha kawei pat ka jingïalehkai, ka Grounded FC ka la jop da 2-0 kol ïa ka Onfroy United. Kane ka la wan urlong lyngba u Dresionmi Sumer, uba la thep ha ka minit kaba 43 bad u Chanborlang Krem (45).
kA jingïalehkai ha ka Sngi Balang kan long hapdeng ka Tyrshang pyrshah ïa ka Tympang SC Ïongshiwiat ha ka por 9 baje mynstep, katba ka Nongkhroh Sohbar ïa ka Tyllilang-i Moobakhon ha ka por 11 baje mynstep.
