Seattle, K’lyngkot:
Ha kane ka khubor la ong ba ki bor pyniaid ka Seatle ki la lah ban shim rai khatduh halor uwei u heh pulit ka Seatle uba la rat ia ka khynnah pule nong India da ka kali ha u Kyllalyngkot 2023. La ong ba katei ka khynnah nongpule na India, ka Jaahnavi Kandula, ka la shah rat ha ka kali pulit kaba dang ïaid pahara bad kaba la rat tyngeh haduh ba katei ka khynnah pule ka la duh ei noh syndon ia ka jingim ha katei ka jingjia.
Ka Kandula, ka la don 23 snem ka rta bad ka dei na ka jylla Andhra Pradesh jong ka ri India. Ha katei ka 23 tarik u Kyllalyngkot jong u snem 2023, ka la shah rat tyngeh ha katei ka kali pulit kaba dang ïaid pahara bad kaba la ñiah da u heh pulit Kevin Dave ha ka surok jong ka nongbah Seatle hi, ha kaba utei u pulit u la pynher stet bha ia ka kali haduh 74 mph (kaba la palat ia ka 119 km/h) katba u dang leit beh ban thwet ia ka jingkhynra droks ha katei ka por.
La ong ba katei ka samla ka la sied haduh kumba 100 phut eiei na ka jaka ba ka don hadien ba ka la shah rat tyngeh ha katei ka kali pulit.
Namarkata, ka heh pulit ba shipor jong ka Seatle Police Station- ka Sue Rahr, ka la iathuh ba na ka liang ka tnat pulit, ki la pynsangeh bad la beh kam noh syndon ia utei u heh pulit barim jong ka tnat.
Kane ka khubor ka long hadien ba katei ka heh pulit ba shipor jong kane ka tnat, ka la pynbna ha ka Sngi Nyngkong ba katkum ka jingpeit bniah jong ki bor ka aiñ, la shem ba u Dave u la pynkheiñ ia ki saw tylli ki kyndon aiñ jong ka tnat pulit bad kumta um lah shuh ban lait na ki jingpynshitom kiba iadei katkum ka jingleh pynkheiñ aiñ jong u hi.
