Shillong, K’lyngkot 08
Ka Shillong Lajong bad ka lahduh jong ka aïom ba la lah, ka Rangdajied United kin pynkhreh ïa ka jingïakhun quarter final kaba nyngkong jong ka Meghalaya State League 2024 ha ka Sngi Palei ha Wahïajer Sports Complex ha ka por 1 baje mynsngi.
Kane ka lympung ïalehkai ba la pynïaid da ka Meghalaya Football Association ryngkat ka jingkyrshan lang ka Sorkar Jylla, ka la wanphai biang hadien ba la pynsangeh ha u Nohprah 2024 namar ka jingleit shim bynta ka kynhun ïalehkai ka Jylla ha ka Santosh Trophy. Kumta kane ka dei ka jingïakhun quarter final kaba nyngkong mynta u snem bad ka jingthmu jong ka MFA ka long ban pynïar ïa kane ka lympung ïalehkai bad ban pynlong ïa ka jingïalehkai kaba kham itynnad.
Ka Lajong bad ka Rangdajied, ki dei ar tylli ki kynhun kiba khlaiñ bor hapoh ka Jylla kiba la jam sha ka quarter final lyngba ka jinglah ban ïalehkai bha. Ka Rangdajied ka la sdang suki ha ka Group-D kaba la long ha Khliehriat da kaba ïakhaid khlem don thep kol shwa ba kan jop ar tylli ki jingïalehkai na ka bynta ban kynjoh sha ka kyrdan ba hakhlieh duh. Katba ka Lajong ka dei ka kynhun kaba la jop ha baroh lai tylli ki jingïakhun jong ka Group-E kaba la long ha Wahïajer.
Kine ar tylli ki klob ki la ïakynduh teng haduh lai sien mynshwa ha ka MSL, kaba la sdang naduh ka phainal jong ka sien kaba ar ha u snem 2019 ha kaba ka Lajong ka la ïoh ban rah ïa ka nam lahduh lyngba ka tie-breaker ha Khliehriat hadien ba ym shym la don ba lah ban thep kol haduh ba kut ki 90 minit bad ruh ha ka extra time. Nangta ki la ïakynduh ha ka jingïalehkai semi-final (double leg) ha u snem 2023 ha kaba ka Lajong ka la jop da 3-0 kol ha ka jingïakhun kaba nyngkong ha Jowai shwa ba ka Rangdajied kan pynphai kylla da kajuh ka jingkheiñ ha ka jingïakhun kaba ar ha Mawkyrwat. Ha kaba kut la rah ïa ka jingïakhun mhadien ba ka RUFC ka la jop da 4-3 kol.
Dangshen kine ki kynhun ki la ïakynduh teng ha kaba ka Lajong ka la pynliem ïa ka Rangdajied da 2-1 ha ka Shillong Premier League 2024 ha ka 24 tarik u Risaw hynrei dei hadien kata ba ka RUFC ka la lah ban kyntiew ïalade da kaba jop saw sien lynter.
Namarkata, la khmih lynti ba kine ki kynhun kin ïalehkai bha ban pynhun ïa ki paidbah nongkyrshan na ka bynta ban pynthikna ban jam sha ka semi final.
