Shillong, K’lyngkot 09
U Bah P.T Sawkmie, MLA barim ka Mawlai ha ka Sngi Palei u la plie paidbah ïa ka lympung ïalehkai phutbol jong ka Umrynjah Sports and Cultural Club ha madan Umrynjah ha kaba la wan shim bynta da 32 tylli ki kynhun ïalehkai na katei ka thaiñ.
Haba phai sha ka jingïakhun jong kane ka sngi sdang, ka Nongkohlew SC ka la lah ban pynliem noh ïa ka Melam United da 1-0 kol. Ïa kane ka shi kol la thep ha ka kylla step.
Ha kane ka sngi plie pyrda la ïadon lang ki nongkitkam ka shnong Umrynjah, ki dkhot ka Umrynjah S&CC, ki ‘riew rangbah ka thaiñ bad kiwei-kiwei.
Haba ai jingkren ha katei ka sngi sdang, u Bah Sawkmie u la pyrto ïa ka Umrynjah S&CC kaba la pynlong ïa kane ka lympung ïalehkai phutbol bad kaba ju shit rhem ban pynlong ïa ki lympung ïalehkai man la u snem.
U la pynpaw ba lada u shah jied kum u MDC ha kane ka ilekshon MDC, un kyrshan ïa ka Mawtawar SC, ka Nongkohlew, ka Umrynjah na ka bynta ka jingïashim bynta jong ki ha Polo ba la pynïaid da ka Shillong Sports Association.
Ha kajuh ka por u la pynshlur ruh ïa ka Mawsiatkhnam SC ba kin shim bynta ha ka phutbol ba la pynïaid da ka SSA bad lada u shah jied kum u MDC un kyrshan ïa ka ruh.
Ka lahduh ha katei ka lympung kan long da ka song pisa kaba T. 20, 000 bad kaba wan ba-ar kan ïoh T. 10, 000. Ïa ka khusnam pisa na ka bynta ka lahduh la bei da u Bah P.T Sawkmie bad ïa kaba wan ba-ar la pynbiang hi da katei ka klob.
