Shillong, K’lyngkot 10
U rangïalehkai shapdeng ka Manchester United, u Amad Diallo, un ïai neh bad kane ka klob na Old Trafford hadien ba u la pyndep ban soi ïa ka kontrak ka ban kut haduh u snem 2030.
Hapoh ka jingïalam u manager bathymmai jong ka klob, u Ruben Amorim, une u rangïalehkai ka Ivory Coast u la pyni ïa ka jinglah ban ïalehkai ba kyrpang, ha kaba u la noh synñiang lai tylli ki kol na hynriew sien ba u la ïoh ban mih madan.
“Nga sngew sarong shisha ban ïasoi ïa kane ka jingïateh kular. Nga la ïoh katto-katne ki por kiba phylla bad kane ka klob mynta hynrei ki dang don shibun kiei kiei kiba dang sah,” la ong u Diallo. “Nga don ka jingangnud kaba khraw ha ka jingïalehkai bad nga kwah ban nangkiew shaphrang ha ka kam ïalehkai haba nga don ha ka Manchester United.”
Hadien ba u la rung na ka Atalanta ha u snem 2021, une u rangïalehkai, 22 snem ka rta, u la ïalehkai 50 sien bad thep khyndai kol na ka bynta ka United.
“Nga la nang shibun kiei kiei naduh ba nga la poi hangne saw snem mynshwa. Nga sngewnguh shibun eh ïa ki coach bad ki nongtrei kiba la ïarap ïa nga ban kiew ha ka kam ïalehkai bad ïa ki nongkyrshan kiba la plie lad ïa nga shakhmat man la ka sngi,” u la bynrap.
Kumba ka long mynta ka Manchester United ka la don ha ka kyrdan 13 ha ka thup ïalehkai jong ka Premier League, da kaba jop tang 6 sien na ki 20 tylli ki jingïalehkai.
“Ka la long ka samoi kaba eh na ka bynta baroh, hynrei nga ngeit skhem ba ngi don ha ka lynti kaba dei bad ka lawei kan long kaba kyrpang shisha. Nga long uba kloi ban ai lut ban ïarap ïa ka kynhun bad ban pynlong ïa ki nongkyrshan jong ngi kiba sngew sarong biang sa shisien,” la bynrap u Diallo.
Hadien ka jingsdang kaba jem bha da kaba ïalehkai tang khyndai sien ha ki lai tylli ki samoi ba nyngkong jong u ha ka United, kaba pynsah kynmaw ïa u Diallo ha dei ha ka jingïakhun pyrshah ïa ka Liverpool ha ka FA Cup ha u snem ba la dep, kaba la pynlong ïa u ban sngewtynnad ïa ki nongkyrshan.
U Technical Director jong ka klob, u Jason Wilcox, u la pynpaw ïa ka jingshaniah ha ka jinglah jong u Diallo, da kaba shim ïa u kum u bynta ba kordor ha ki jingthmu jong ka United ha ka lawei ka ban wan.
“Baroh ki sngewkmen ïa ka jingkiew jong u Amad – ka jingtbit jong u ha ka bol, ka jinglah ban ïalehkai bun jait bad ka jingkut jingmut jong u ka pynlong ïa u kum u bynta ba kongsan jong ka lawei jong ka Manchester United,” la bynrap u Wilcox.
