Los Angeles, K’lyngkot:
Ki bor pyniaid ka Los Angeles ki la iathuh ba ka jingdon kiba khlad na ka pluh ding ha Los Angeles ka la kiew sha ka 10 ngut ha ka step Sngi Palei.
Wat la ki bor pyniaid ka ri ki la phah ia ki ‘National Guard’ ban leit iarap bad ban ïakhun ia katei ka ding ha Los Angeles hynrei la ong ba ka long kaba sngewsih ba ia kitei kiba shah ktah pat ym shym la lah shuh ban pyllait im ha ka por kaba biang.
Katei ka ding ka la bam duh ia palat 19,000 akar jong ka Pacific Palisades kumjuh ia kumba 13,000 akar ki bynta jong ka Altadena bad kaba kham sngewkhia ka long ba tad haduh ka Sngi Palei ruh ym pat shym la lah ban tem ne pynlip ia kitei ki 2 tylli ki jingpluh ding.
Ki kynhun pynlip ding ki iathuh ba kumba 9,000 tylli ki iing bad ki jingtei kiba don ha kylleng jong katei ka nongbah ki la julor bad um lut ha katei ka ding ba shyrkhei.
Haba iadei bad kane, la ioh bat noh ia 20 ngut ki suba don kti halor katei ka jingpluh kaba la sdang ha ka Sngi Ba-ar jong kane ka taiew.
