Kabul, K’lyngkot:
Ka Afghanistan ha kane ka kynti, ka la pyntikna ia ka India ba ka jingiadei hapdeng kine arliang ri ka dang lah ban iai bteng bad ban nang iajan ruh nangne sha khmat lada ka India kam thew ia ki jingduna jong katei ka ri bad ki bor pyniaid ka Afghanistan ki la pynpaw ruh na ka liang jong ki hi, ka Afghanistan kam shym kwah ban buh jingma ia kano-kano ruh ka ri hynrei ka dang ialeh ban pynbha ia ka jingiadei bad ka jingiatrei lang bad ki para ri ba marjan bad ka na ka bynta ka bha ka miat lang jong ki paidbah bad ka pyrthei baroh kawei.
Ha katei ka jingkren ba la pyllait ha kine ki khyndiat sngi ba la leit, ka Taliban ka la ong ba ka India ka dei ban pynshlur ia ki paidbah jong ka ban leit- ban wan bad ban beh ia ki kam-ki jam sha katei ka ri, da kaba wanrah ruh ia ki jingtyrwa ki ban khring ia ki nong India ba kin leit sha katei ka ri khnang ba ka jingiadei hapdeng jong ka Afghanistan bad ka India kan nang kham jan bad skhem. Ki jingtyrwa ba ki bor pyniaid ka Afghanistan ki wanrah sha ki nong India ha kane ka por, ki kynthup naduh ka visa ia ki khynnah pule bad kumjuh ia ki nongpang bad ki nongkhaïi jong ka India ba kin leit ban iatrei lang bad ki heh na katei ka ri Afghanistan na ka bynta ka jingmyntoi lang jong baroh arliang ri.
U Myntri ka tnat kam bar ri jong ka Afghanistan, u Mawlawi Amir Khan Muttaqi bad u Myntri ka tnat kam bar ri ka India- u Vikram Misri, ki la ioh ban iakynduh markhmat ha Dubai ha ka Sngi Balang bad ki la ioh ruh ban iakren halor katto katne ki mat ba kongsan na ka bynta ka jingiatrei lang kaba pura hapdeng ka Afghanistan bad ka India ha kine ki sngi ban wan.
