Mawkyrwat, K’Lyngkot 12
U Bah Pius Marwein, MLA ka Ranikor Constituency ha ka 10 tarik u Kyllalyngkot 2025 u la ïoh ban aiti ïa ka Work Order kaba T. 33 lak sha ka Umpung Athletics Sports & Cultural Club lyngba ka skhim Chief Minister Special Development Fund (CMSDF) jong u snem 2024-25 na ka bynta ban shna pynbha ïa ka madan ïalehkai kynjatbol kynthup ruh ïa ka jingker bad jingshna gallery ha ka shnong Umpung, South West Khasi Hills District.
Na ka liang ki nongkitkam ka Umpung Athletics Sports and Cultural Club ki la pynpaw ka jingsngew kmen kaba khraw namar hadien 43 tylli ki snem ka jingïaid lynti jong ka Sports club mynta ka la urlong ban ïoh ïa ka madan kaba paka hadien ba u MLA ka thaiñ u Bah Pius Marwein u la shimkhia ïa kane ka kam. Ki ngeit skhem ruh ba kane ka madan kan long shisha ka jing kyrkhu kaba khraw na ka bynta ban kyntiew ïa ka sap ka phong ki samla hapoh kane ka shnong.
U Bah Marweiñ haba ai jingkren ha ka jingïalang ha Dorbar Hall Umpung u la ong ba kane ka sngi kan long ka sngi kaba sah kynmaw ïa ka shnong ka thaw baroh kawei ha kaba u la ïoh ban aiti ïa ka work order kaba ka sports club bad ki paidbah ki la angnud la slem.
U la ai khublei kyrpang ruh ïa u Myntri Rangbah ka Sorkar Jylla u Conrad Sangma uba la ai sngewbha ïa kane ka skhim.
Nalor kane u la buh ruh ka jingkyrpad ïa ka Umpung Athletics Sports & Cultural Club ba kan pyntrei hok bad pynïaid beit pynïaid ryntih ïa kane skhim khnang ba kan long shisha ka jingmyntoi ïa ka dong ka thaiñ.
Shuh shuh u la ïathuh ruh kum shibynta ban kyntiew ïa ki ‘rang bad ki ‘thei kiba donsap ha ka kam jngi, ka jingpyntrei ïa ka swimming pool ka la ïaid shaid-shaid bad lehse kan dei ka swimming pool kaba nyngkong eh bad ka heh duh ha ka district.
Nalor ban kyntiew ïa ki samla ha ka kam ïalehkai, u Bah Marweiñ u angnud ruh ban wanrah ïa ki kam pynroi hapoh ka constituency naduh ka umbam umdih, ki jaka pule bad ka ki jaka sumar bad kaba u angnud eh ka long ban wanrah ïa ka kolej ka bym pat don haduh mynta hapoh ka constituency.
U la ïathuh ruh ba mynta u dang wad ïa ka jaka kaba long pdeng ïa baroh ki shnong khnamg ba pynsuk ïa ki samla pule khamtam ïa ki kmie ki kpa ki bym donlad ban phah pule ïa ki khun sha kiwei kiwei ki jaka kum ha Mawkyrwat bad Shillong.
Ha katei ka sngi la pynïaid ïa ka jingialang da u Bah Wallet Khardew-saw, Myntri shnong ha ryngkat ka jingdonlang ki nongkitkam ka UAS &CC u bah Bookingstar Khardewsaw, Bah Straining Kharwanniang bad ki paidbah nong shong shnong.
