Chennai, Kyllalyngkot:
U Myntri Rangbah ka Tamil Nadu, u MK Stalin, u la wanrah ïa ki ar tylli ki aiñ pynkylla hapoh ka ïingdorbar jong ka jylla, ha kaba ki thmu ban pynshitom da kaba tyngeh ïa ki kam runar pyrshah ïa ki kynthei.
Katba kawei ka bill ka dawa ban pynkhlaiñ ïa ka Tamil Nadu Prohibition of Harassment of Women Act, 1998, kawei pat ka bill ka tyrwa ban pynkylla ïa ka jingtreikam jong ka Bharatiya Nyay Sanhita bad ka Bharatiya Nagarik Suraksha Sanhita ha ka jylla Tamil Nadu.
Haba wanrah ïa kane ka bill, u Myntri Rangbah u la pynskhem ïa ka jing-angnud jong ka sorkar jong u na ka bynta ka jingbha jingmiat jong ki kynthei.
“Ka jingshah lehbeiñ ki kynthei ka dei ka kam runar kaba ym lah ban map. Ka jingpynshitom ba la ai na ka bynta kum kine ki kam runar ka dei ban long kum ka jingmaham kaba khraw khnang ba kan khanglad ïa ki briew ban leh ïa kum kine ki kam runar,” u la ong bad bynrap ba ka sorkar jong u ka ngeit ba ka jingpynshitom ha kum kine ki kam runar “dei ban kham pyrkhing shuh shuh.”
“Ka sorkar DMK ka la trei na ka bynta ka jingbha jingmiat jong ki kynthei, ban wanrah ïa ki shakhmat ha ka imlang-sahlang, ka saiñ pyrthei bad ka ïoh ka kot. Ka jingïashim bynta jong ki kynthei ha ka imlang-sahlang ka la nang kiew namar kine ki sienjam,” u la ong.
U Stalin u la pynpaw biang ba ka sorkar jong u ka long kaba khlem artatien ha ka jingaiti jong ka na ka bynta ka jingshngaiñ jong ki kynthei, bad u la kular ban leh da kaba pyrkhing, khlem da pyndem pyrshah ïa ki nongleh ïa kine ki kam runar. “Ngi ïaleh pyrshah ïa ki kam runar pyrshah ïa ki kynthei da kaba tyngeh”, u la ong ha ka ïingdorbar.
U la kyrshan ïa ka jingkren jong u da ki jingtip, da kaba ong ba ha ki 86 percent na kum kine ki jingjia, ka sorkar ka pynngat ha kijingshah mudui hapoh 60 sngi.
Kine ki aiñ pynkylla ki wan ha ka por ba ka seng ba bat ïa ka jingsynshar ka Dravida Munnetra Kazhagam (DMK) ka la mad ïa ka jingshah kynthoh hadien ka jingshah lehbeiñ ha ka skulbah Anna.
Ki ïoh ïa ka jingkordor namar ba ka jingïalang dorbar kaba mynta ka la shah pynthut beit ha ka jingjia kaba dang shen eh jong ka jingshah thombor kaba la jia ha ka jaka pule jong ka Anna University.
Ka All India Anna Dravida Munnetra Kazhagam (AIADMK) bad ka Bharatiya Janata Party (BJP) bad kiwei seng synrop lang ki la pynlong ïa ki jingïakhih pyrshah bunsien pyrshah ïa ka jingjia shah thombor ha Anna University.
Ka jingpyrta shla hapoh bad shabar ka ïingdorbar, ki jingïaid paidbah bad ki jingïalang paidbah ha kylleng ka jylla la sakhi hadien ka jingjia shah thombor kaba la jia ha ka 23 tarik, Nohprah.
Kawei ka samla pule Engineering kaba dang 19 snem ka rta ka la shah thombor ha ka jaka pule ha uwei u nongleh kam sniew uba la shah kynnoh ba u ju leh beijot, uba la ïoh ban rung sha ka jaka pule lyngba u nongtrei jong ka skulbah.
Ka seng kaba bat ïa ka jingsynshar ka Dravida Munnetra Kazhagam (DMK) ka la mad ïa ka jingshah kynthoh ha kylleng ka ri halor ka rukom pynïaid jong ka ïa kane ka mukotduma.
Ka la don ka jingbitar kaba jur bha haba ka kopi jong ka jingujor ejahar ha katei ka mukotduma, kaba don ïa ki jingtip shimet jong katei ka briew kaba la lait im na ka jingshah thombor, la pynmih paidbah ha ki Social Media.
Ha kine ki khyndiat bnai ba la dep, ka la don ka jingkynrei ki kam runar ha ka jylla, khamtam eh pyrshah ïa ki kynthei.
Ki seng ka liang pyrshah ki la pyndonkam ïa kine ki jingjia ban pynkhihwin ïa ka DMK kaba synshar ha kaba ïadei bad ka jinglong jingman jong ka aiñ ha ka jylla.
