Kyiv, K’lyngkot:
U President ka Urkaine- u Volodymyr Zelensky ha ka Sngi U Blei u la pyntip ba ka Ukraine ka long ba la kloi ban aiti noh ia ki shipai jong ka North Korea lada ka Russia ka pyllait ia ki briew jong ka Ukraine kiba la shah bat bad shah kem sha Russia.
Kane ka jingtyrwa jong u Zelensky ka long ruh tang hadien katto katne kynta ba ka tnat National Intelligence Service jong ka South Korea ka la pyntikna halor ka jing-ioh kem jong ka Ukraine ia 2 ngut ki shipai ka North Korea ha ka sngi ba la dep.
Namar ka Ukraine naduh ka Sngi Saitjaiñ ka la dep pyntip ba kitei ki shipai ka North Korea ki la mynsaw hapdeng ka jingiakhun bad ki shipai ka Ukraine ha ki thaiñ Kursk jong ka Russia, hynrei ha katei ka por kitei ki shipai kim pat pynshai ialade ba ki dei ki shipai jong katei ka ri.
Hynrei ha ka Sngi U Blei, ki nongthoh khubor ka Ukraine ki la pyntikna ba ki shipai ka Ukraine ki la ioh bat ia kitei 2 ngut ki shipai jong ka North Korea naduh ka 9 tarik u Kyllalyngkot ba la lap ia ki na Kursk jong ka Russia hapdeng ka jingiakhun bad ki shipai Ukraine.
Namarkata, ha ka jingkren jong u kaba u la pyllait paidbah ha ka rynsan ‘X’, u Zelensky u la ong ba ka Ukraine ka kloi ban pyllait noh ia kitei ki shipai ka North Korea lada ka North Korea ka iakren bad ka Russia ban pyllait noh ia ki shipai ka Ukraine pat kiba la shah bat bad shah kem ha ka Russia baroh shi katta.
Hynrei, u la ong ba ia kito ki shipai ka North Korea ki bym kwah shuh pat ban leit phai biang sha North Korea, ka Ukraine ka don da kiwei pat ki jingthmu bad ki lad naka bynta jongki. Namar ka Ukraine, ka United States bad ka South Korea, ki la kynnoh ba ka North Korea ka la dep phah palat 10,000 ngut ki shipai jongka sha ka Russia ban pyniakhun naka bynta ka Russia. Hynrei, na ka liang jong ka Russia bad ka North Korea pat kim shym la ai ktien ne pyntikna halor katei ka jingkynnoh jong kine ki ri haduh kine ki sngi ruh.
Ha kawei ka video ba la pyllait da utei u President ka Ukraine, la iohi ia kitei ki 2 ngut ki shipai ka North Korea kiba dang shah tohkit.
ha ki kynhun tohkit ka Ukraine, ha kaba uwei na kitei ki shipai North Korea u la thiah khop ha ka jingthiah bad uwei pat u shong hakjat ka jingthiah ha ryngkat ka jingshah sop- shah spaiñ namar ki jingmong- jingmynsaw ba ki la ngat ha katei ka jingiakhun thma pyrshah ia ki shipai Ukraine.
