Shillong, K’lyngkot 14
Ka United Brothers bad ka Mawsyiem CC ki la ïoh jingjop ha ka lympung ïalehkai Third Division Cricket League 2024-25 ba la pynïaid da ka Shillong Cricket Association ha ka Sngi Ba-ar ha madan Urkaliar, Shillong.
Ha ka jingïakhun kaba nyngkong, ka United Brothers ka la pynliem noh ïa ka Turshaphrang CC da 32 run. Ka Turshaphrang kaba la jop ïa kynting pisa, ka la ailad shwa ïa ka United Brothers ba kan tied nyngkong ha kaba ka la ïoh 172 run bad shah pynhap 6 wiket ha ki 20 over. U Ravi Shankar Yadav u la khyrwit ïa ka shiteng spah kaba 83 run na ki 44 bol bad u Naseem Ansari u la ïoh 27 run na ki 22 bol. Katba u Shatphyrnai Bakai u la shim 2 wiket bad 1 wiket la ïoh da u Erich Lyngdoh na ka bynta ka Turshaphrang.
Haba wan beh ïa ka thong, ka Turshaphrang ka la lah ban ïoh tang 140 run bad shah pynhap 7 wiket ha ki 20 over. U Eldridge Rynjah u la tied 37 run na ki 14 bol bad u Erich Lyngdoh u la ïoh 18 run na ki 8 bol. Katba u Piyush Yadav u la shim 3 wiket bad 2 wiket da u Nassem Ansari na ka bynta ka United Brothers. Ïa ka nam ‘Player of the Match’ la ïohpdiang da u Ravishankar Yadav.
Haba phai sha kawei pat ka jingïakhun kaba ar, ka Mawsyiem ka la jop da 23 run ïa ka Unite Mates. Ka Mawsyiem ka la kam trai ba kan tied nyngkong ha kaba ka la ïoh 124 run bad shah pynhap 6 wiket ha ki 20 over. U Freddy Kharjan u la tied 33 run na ki 38 bol bad u Kenneth u la ïoh 23 run na ki 25 bol. Katba u Arnab Rahman u la shim 2 wiket bad 1 wiket da u Rupam Das.
Haba wan beh ïa ka thong, ka Unite Mate ka la ïoh tang 101 run bad shah pynhap 10 wiket ha ki 19.4 over. U Bishal Das u la tied 34 run na ki 25 bol bad u Joyottom Chaudhary u la ïoh 23 run na ki 41 bol. Katba u Khraw Mylliemmngap u la shim 4 wiket na ka bynta ban ïohpdiang ïa ka nam ‘Player of the Match’ bad ïa ki 2 wiket la shim da u Wanbiang Nongrum.
