Shillong, K’lyngkot 14
Ka Rymbai Shkenshynriah ka la long sa kawei pat ka kynhun kaba la lah ban pynthikna ban jam sha ka semi final ha ka Meghalaya State League 2024, hadien ba ka la lah ban pynliem noh ïa ka Chipakkore da 2-0 kol ha ka quarter final kaba khatduh kaba la long ha ka Sngi Ba-ar ha PA Sangma Stadium kaba ha Tura.
Kane ka jinglah ban pynthikna ka la wan urlong lyngba u H Rymbai (68) bad u I. Bareh (79) na ka bynta ban pynlong ïa kane ka kynhun ban ïasoh lang ryngkat ka Shillong Lajong, Mawlai SC bad ka Ladthadlaboh ban jam sha ka semi final. Ïa ka prokram ïalehkai jong ka semi final shen yn pynbna da ka Tournament Committee.
Wat la ki la don haduh 24 tylli ki kynhun kiba la wan ïashim bynta na kylleng ka Jylla ha kane ka lympung, hynrei mynta sa tang saw tylli kynhun ha kaba ar tylli ki dei na Shillong (Lajong bad ka Mawlai), kawei na West Jaiñtia Hills (Ladthadlaboh) bad kawei pat na East Jaiñtia Hills (Rymbai Shkenshynriah).
Kane ka long ka jingïakhun quarter final kaba khatduh ba la pynïaid da ka Meghalaya Football Association (MFA) ha kaba kine ki kynhun ki la ïoh ban ïakhun ha ka madan kaba itynnad jong ka PA Sangma Stadium.
Haba phai khyndiat sha kiwei pat ki jingïakhun quarter final ba la dep, ka Lajong ka la pynliem noh ïa ka Rangdajied United da 3-1 kol, kumjuh ka Ladthadlaboh ka la jop da 5-2 kol ïa ka Sutnga bad ka Mawlai ka la pynjem khnap haduh 8-0 kol ïa ka Khliehmawlieh.
Ïa kane ka lympung la kyrshan lang da ka Sorkar Jylla bad ka jingthmu sha lyndet ka long ban sei ïa ki nongïalehkai kiba kynsai ban mihkhmat ïa ka Jylla ha ki lympung ‘national level’ ki ban sa long shen.
Kumba ka paw dei tang ka Lajong bad ka Mawlai kiba la ïoh rung teng sha ka semi final ha ka MSL, bad ka SLFC ka la ïoh ban bat teng ïa ka nam lahduh ha ka aïom ïalehkai 2019. Ka Ñiaw Wasa United ka la jop ha u 2018 bad ka Rangdajied ka dei ka kynhun ba lai ban ïoh jingjop ha u 2023.
