Agartala, Kyllalyngkot:
U Myntri Rangbah ka Tripura u Dr. Manik Saha u la pynpaw ba ka jylla ka la kem haduh 2,697 ngut ki briew bad kurup ïa ki jingdih pynbuaid kiba shong dor palat T.1,500 klur hapdeng u snem 2022 bad 2024.
Haba kren ha ka ïingdorbar thawaiñ jong ka Tripura ha ka Lah Sngi U Blei, u Dr. Saha uba bat ruh ïa ka kam kum u Myntri ka tnat ki kam pohïing, u la pynpaw ïa ka jingpyrshang jong ka sorkar kaba dang ïaid shakhmat ban pynlong ïa ka Tripura ka jylla kaba lait na ki jingdih buaid.
U Dr. Saha u la kdew ba shwa u snem 2018, ka Tripura ka la ïakynduh ïa ki jingeh kiba jur bha kiba ïadei bad u drok. Hynrei ka jinglong jingman ka la kylla shibun hapoh ka jingsynshar kaba mynta, kaba la shim ïa ka rai ban pyntreikam halor ka jingthmu ban pynduh pyndam ïa u drok hapoh ka jingïalam jong u Myntri ka tnat ki kam pohïing ka sorkar kmie u Amit Shah.
“Ka Nesha Mukt Abhiyan jong ka sorkar jylla ka la ai ïa ki jingmih kiba pawnam, ha kaba la ïoh ban kurup ïa shibun ki jingdih ba be-aiñ kum u Ganja, dawai jyrhoh, ki dawai pynbuaid, bad u drok Heroin. Ki pulit ki la pynlong ïa ki jingkhynra kiba jur, ki la pynjulor ïa ki jaka ba rep ïa u Ganja, bad ki la kem ruh ïa ki briew kiba donkti ha ka kam khaïi drok,” ong u Dr. Saha.
Kumba la lum bad buh jingkheiñ, la ong ba naduh u snem 2022-2024, u Myntri Rangbah u la ai ïa ki jingkheiñ ba bniah halor ki kam pyrshah drok jong ka jylla bad u la ong ba ha u snem 2022, la buh jingujor pyrshah ïa ki 562 ngut, la kem ïa ki 759 ngut ki briew, ha u snem 2023: 633 ngut ki la shah ujor, 1,052 ngut ki la shahkem bad ha u snem 2024: 407 ngut ki la shah ujor, 886 ngut ki la shahkem.
Ha ki lai snem, ki pulit ka Tripura ki la buh jingujor haduh 1,665 tylli ki mukotduma bad ki la kem haduh 2,697 ngut ki briew. Tang ha u snem 2024, ka jylla ka la ïoh ïa ka thong da kaba pynduh pyndam ïa ki jingthung Ganja kiba la buh rekod bha. “Ka dor ïew jong ki drok ba la kurup ka la kiew haduh ar shah ha kane ka por, kaba pyni ïa ka jingkiew kaba 106%”, la ong u Dr. Saha.
Naduh u snem 2022 haduh u snem 2024, ki pulit jong ka jylla ki la ïoh kurup ïa ki jingdih pynbuaid kiba kynthup ïa u Ganja ba 1,54,658 kg, ki bilor dawai jyrhoh, da 5,82,100 tylli, ki dawai pynbuaid: 25,62,791 tylli, u Heroin: 34,971 grams, ka jingïoh ban pynjulor ïa u Cannabis ka la long da 2,45,91,258 kg.
Ka dor jong u drok ba la ïoh kurup kynthup ïa ki kali ba la shah kurup ka la kot sha ka T. 1,587.47 klur. U Dr. Saha u la ïakren ruh halor ka jingthaw ïa ka Committee ban ïalap ban lait na u drok ha ka ri India katkum ka jingbthah na ka tnad sorkar kmie jong ka Social Justice and Empowerment.
Kane ka komiti ka treilang bad ki tnad bapher bapher jong ka jylla, kynthup ïa ka Social Welfare, ka ïing ka sem, ka pule puthi, bad Youth Affairs & Sports, bad kumjuh ruh ka Narcotics Control Bureau, ki seng treimon sngewbha, bad ki bor kiba don ha ka kyrdan ban khmih ïa ka distrik, na ka bynta ban pyntreikam ïa ki lad jingïada bad ban ïakhun pyrshah ïa ka jingdih drok ha ka rukom kaba paka.
