I. R. Dkhar
Mynhynnin ha ka Kotkhubor (U Nongsaiñ Hima dt. 13.1.2025), ngi la ïohi ïa ka report ba ki don arngut ki ‘thei samla na Jaiñtia Hills kiba la ïoh pyllait na ka Indore, Madhya Pradesh hadien ba phah ïa ki ban leit trei ha ka jaka khem met – ka ktem kaba ym sngewtynnad bad bym ïahap ïa ka jinglong jong ki. La ong ba kine ki ‘thei samla, lehse lem bad kiwei kiwei ruh, ki la shah pyntbit ban shah hikai ha kaba ïadei ha ka Beauty Parlour bad hadien ba la pyndep, la phah ïa ki sha Madhya Pradesh ban trei.
Pynban kane ka kam ka long kaba ym ïahap na ka bynta jong ki. Lehse ngi lah ban ong ba ka long ka kam kaba khlem akor bad kaba isih. Ki la ïoh ban phet noh na kata ka jaka da ka jingïarap jong u MLA BJP ka Madhya Pradesh ryngkat bad ka jingïarap u para Khasi ba trei ha Delhi. Ki la ïoh ban wan phai noh sha ïing sha ka Jylla la jong sha Jaiñtia Hills, ong shuh shuh ka khubor.
Na katei ka khubor, ka pynpyrkhat ïa ngi ba hangne hapoh Jylla Meghalaya jong ngi, ym don eiei ki lad ki lynti ïa ki samla ba kin ïoh kam ïoh jam. Bun na ki samla jong kane ka Jylla ki leit shabar na ka bynta ki jingpule bad ki jingshah hikai bad hadien nangta ki trei syndon shabar ka Jylla Meghalaya, sha kylleng ki jaka jong ka ri India. Ki jingpule ruh ki duna bha na ka bynta ki lad ïoh kam ïoh jam. Katba shabar ka Jylla, bun kyrhai ki jait kam khamtam ha kane ka juk jong ki jingdawa ka por. Ki khynnah samla kiba wad ïa ki kam ki jam ki poi ruma rutit sha kylleng ki jaka jong ka ri India bad shabar ruh wat ha ka jingpynshoi bad jingpynbiej na ka bynta ka kam. Haba ym donkam ha kane ka Jylla la jong, la dei hi ïa ki samla ban leit shang shabar kat shaba ki don ki jingtip ban ïoh kam ïoh jam.
Na ki khana kiba ngi ju ïohsngew, ki don bun ki samla kynthei bad shynrang kiba la leit trei shabar ka Jylla bad don ruh na ki kiba la wanphai noh na ki daw bun ki jingeh kiba ki ïakynduh. Bad hangne hapoh Jylla la jong pat, ki poi ruma rutit sha ki kam kiba bha bad kiba sniew ruh.
Kumta, ka Sorkar Meghalaya ka la dei ban thaw ki lad ki lynti na ka bynta ban pynmih ki kam ki jam na ka bynta ki samla. Ka dei ban thaw ki company bapher bapher ban wan seng kam seng jam.
Nga sngew ban ong ba ki Minister, ki MLA, ki nongmihkhmat bad ki nongïalam bapher bapher jong ka jaitbynriew ki la dei ban thaw ïa ki policy bapher bapher ym tang ïa ki kam sorkar hynrei ïa kiwei pat ki lad kumno ban pynmih ïa ki kam ki jam na ka bynta ki samla. U paidbah u la jied ïa ki ban thaw aiñ bad thaw ïa ki policy na ka bynta kumno ban thaw ïa ki lad ki lynti na ka bynta ki kam ym ban pyrkhat ïa ka jingmyntoi jongno-re-jongno.
