Shillong, K’lyngkot 17
Ka Shillong Lajong FC kan ïakhun pyrshah ïa ka Sreenidi Deccan FC mynta ka sngi ha ka por 4:30 janmiet ha Deccan Arena, Hyderabad jong ka lympung ïalehkai I-League.
Hadien ar tylli ki jingjop lynter mynta u snem ha la ïing pyrshah ïa ka Real Kashmir & Sporting Club Bengaluru, ka Lajong kan khmih lynti ban bteng ïa ka rukom jop jong ka haba kan ïakhun pyrshah ïa ka kynhun ïalehkai kaba kham khlaiñ bha ka Sreenidi Deccan kaba haduh mynta kam shym la lah ban pynurlong ïa ka jingkhmih lynti jong ka ban long kawei na ki kynhun ba ha khlieh duh ha ka jingïakob jong kane lympung.
Ha ka jingïalang bad ki nongthoh khubor shwa ka jingïalehkai kaba la long kham ha shwa jong mynta ka sngi, u coach ka Lajong, Jose Carlos Rodriguez Hevia u la pynpaw ba u sngewkmen ïa ka rukom ïalehkai jong ka kynhun ha une u snem thymmai da kaba jop ar tylli ki jingjop kiba kongsan bad ruh ban bat ar tylli ki jingïalehkai khlem shah thep kol. U khmih lynti ba ka kynhun kan ïaid shakhmat bad bteng da kajuh ka jingjop pyrshah ïa ka kynhun kaba kham khlaiñ bha katba ka dang ïalehkai ruh shabar na la ïing bad u don ka jingshaniah ba ki nongïalehkai kin ïakhun ban ïoh baroh 3 poiñ lashai ka sngi.
Kane kan dei ka jingïalehkai kaba ar shabar na la ïing jong ka Lajong ha kane ka samoi ïakhun bad mynta ka don ha ka kyrdan kaba san jong ka miej kheiñ poiñ da kaba ïoh 12 poiñ na ki 8 tylli ki jingïakhun. Katba ka Sreenidi mynta ka don ha ka kyrdan ba phra ha ka miej ïakheiñ poiñ ryngkat 10 poiñ.
Kane ka pynshisha ba ka dei ka jingïakhun kaba sngewtynnad namar baroh ar tylli ki kynhun kin ïaleh ban ïoh baroh 3 poiñ bad ban kiew shuh-shuh ha ka miej kheiñ poiñ.
Ïa kane ka jingïakhun yn pyni ‘live’ lyngba ka Sony Sports 2 Channel, ka SSEN mobile app bad ka ssen.co website.
