Washington, K’lyngkot:
Kawei ka longkmie bad u kurim ki la shah kem noh hadien ba ki la shah pynngat hapoh ki kyndon pynkheiñ aiñ pyniap briew. Kane ka long hadien ka jingiap jong u khun ba 2 snem uba la shah khynñiat sha ka pung jngi ha u kpa da kaba pynksan ba u dang ialeh ban ai jinghikai jngi ia u. Katkum ka jing-iathuh jong ki nongsakhi, la ong ba utei u khyllung u la khlad noh ha u bnai Jylliew mynshem snem hadien ba um lah shuh ban ring bad pynhiar mynsiem.
Kumta, ia katei ka longkmie kaba la ithuhkum ka Annastacia Atkins 24 snem bad u kpa Dakota Shawn Hays 29 snem, la kem noh ha ka Sngi Nyngkong hadien ba la dep ban bishar bniah halor ka jingiap jong utei u khyllung ha utei u snem ba la dep.
U Hays u dei u ‘panah jong utei u khyllung 2 snem, bad u la shah pynngat hapoh ki kyndon pynkheiñ aiñ jong ka jingpyniap briew namar ka jingpynshitom beiñ jong u ia utei u khyllung ba dang 2 snem tang ban hikai jngi ha um. Katba ia ka Atkins kaba long ka kmie trai jong utei u khyllung pat, la pynngat hapoh ki kyndon pynkheiñ aiñ ba ia dei bad ka jingailad jong ka ia utei u kurim ba un wanrah jingma ia ka jingim jong utei u khun jong ka. La ong ba utei u khyllung u la khlad noh ha ka 17 tarik u Jylliew 2024, tang hadien 3 sngi ba kitei shi kurim ki la phone ban pyntip hi noh sha ki pulit ha u nombor 911 hadien ba utei u khyllung um kyndit bynriew shuh katba ki dang hikai jngi ia u ha ka iingsah ka ñia jong ki.
