Jowai, K’Lyngkot 19
Ki nongïalehkai na 11 tylli ki District ha ryngkat ka West Jaiñtia Hills ki la poi mynta ka sngi sha madan Ladmukhla na ka bynta ka jingïalehkai kaba la ap khmih lynti bha jong ka jingsdang ïa ka 6th Meghalaya Games 2025.
La pdiang sngewbha ïa ki ha ka jaka pdiang sngewbha da u MLA ka thaiñ uba dei ruh u Chairman ka MUDA, Bah Wailadmiki Shylla, u Deputy Commissioner Bah B. S Sohliya (IAS), ka Additional Deputy Com-missioner ka Kong D. V Lyngdoh bad ki nongpynïaid ki la don lang ha katei ka jaka ban peit ïa ki jingpynbeit bad ban pynthikna ba baroh ki don ha ka jaka.
U Bah Wailadmiki u la pynshlur ïa ki nongshong shnong jong ka West Jaiñtia Hills district ban pdiang burom bad kyrshan ïa ki nongïalehkai ha ka por ba ki don hapoh ka district.
Katto-katne na ki nongïalehkai ki la pynpaw ka jingkmen bad jingsngewhun halor ka jingpynbeit ïa kane ka kam. Bun ki la sngewnguh ïa ka jingpdiang sngewbha bad ka jingpynkhreh kaba la pynbeit bha ha ka jaka pdiang sngewbha.
Na ka liang ki bor pynïaid district ha ka sngi Saitjaiñ ki la pynlong ka jingïakynduh bad ki lad pathai khubor ha Confer-ence Hall ka DC’s Office, Jowai ban ai ïa ki jingtip ba thymmai halor ki jingpynbeit ïa ki jingïalehkai, ha kaba ka jingïalehkai phutbol ka la sdang kham kloi kata ha ka 15 tarik mynta u bnai.
U Deputy Commis-sioner Bah B.S Sohliya u la ïathuh ïa ki jingpyrshang ba kyrpang ba la leh ha ka jingpynkhreh ïa ki jingïalehkai kynthup ka jingplie pyrda ha ka 13 tarik da kaba pyllait ïa ka jingrwai phang pdeng bad ka durkhih ka Meghalaya kumjuh u Mascot “U Kiang” ha ka riam jong u nongïaleh laitluid “U Kiang Nangbah” ba la pynwandur da u Kamtre Sumer kum shibynta jong ka jingïakob plie ba la pynlong da ka ophis jong u Deputy Commissioner, West Jaiñtia Hills.
U la ïathuh shuh shuh ba ki waheh shnong jong kawei pa kawei ka shnong ha ka sor Jowai ki la noh synñiang shitrhem ha ka jingpynkhreh, da kaba pyni ïa ka jingïashim bynta ban pynlong ïa kane ka jingïalehkai kaba jop.
U DC u la khot ruh ïa ki nongshong shnong ban ïatreilang bad ban ïashim bynta shitrhem ha kane ka jingïalehkai, da kaba pynshlur ban wan sakhi ruh ïa ki jingïalehkai kaba long shi bynta jong ka jingkmen.
Ha kawei pat ka liang u Bah John F Kharshiiing, Working President ka MSOA u la ïaroh ïa ka bor pynïaid district bad ïa ki 15 tylli ki komiti kiba la trei shitom ha ka jingpynkhreh ïa ka Meghalaya Games.
U la pyntip ruh ba ha kane ka 6th Meghalaya ka dei ka sien kaba nyngkong ban don 7 ngut ki nongïalehkai kiba duna ha ki dkhot met (para-athlete), saw ngut ki kynthei bad lai ngut ki shynrang kin ïashim bynta ha ka jingïalehkai para shooting (Pistol & Rifles) bad ïa kane la lah ban leh lyngba ka jingshimkhia u Myntri Rangbah ka Jylla u Conrad K Sangma ban kynthup ïaki briew kiba kyrpang.
U khmih lynti ruh ba ha ki por ban wan kan don ka jingïashim bynta kaba kham bun jong ki para-athlete, da kaba pynpaw ba ka jylla ka aiti lut ban kyntiew ïa ka jingïadon bynta lang ha ki jingïalehkai.
U Bah Kharshiing u la pyntip ruh ba ha ka sien kaba nyngkong ha ki lympung ïalehkai jong ka jylla, ar ngut ki nongïalehkai kiba tbit bha na Australia, kiba long kum ki High performance jong ka MSOA ba kynthup u Robert Kabas bad u Ian Campbell kin don lang ban sakhi ïa ka jingplie pyrda ïa ka lympung ïalehkai.
Nalorkata, u la pyntip ruh ba ha kane ka Meghalaya Games la don 3500 ngut ki nongïalehkai ban ïakhun na ka bynta baroh 1600 tylli ki takma, ba kynthup ïa 500 tylli ki takma ksiar, 500 tylli ki takma rupa bad palat 600 tylli ki takma rnong.
U Superintendent of Police, Bah C. Syrti (MPS) u la pyntip ba ki bor pulit ki la long ba la pynkhreh ban ai ka jingïada khnang ban pynthikna ïa ka jingshngaiñ ha kane ka lympung.
