New Delhi, Kyllalyngkot:
Ka Supreme Court ha kine ki khyndiat sngi ba la leit ka la ong ba kan bishar ha ka 13 tarik, Rymphang ïa ki jingujor ba la mudui da ka sorkar Gujarat bad kiba bun ngut kiwei pat kiba shah rai pynrem ha ka mukotduma jong ka jingshahthang rel ha Godhra ha u snem 2002.
Ka kynhun nongbishar jong u J K Maheshwari bad u Aravind Kumar ki la kren shai ban ym ai kano kano ka jingpynjlan por halor kane ka kam ha ka tarik bishar ban wan.
Ha ka 27 tarik, Rymphang, 2002, ki la don 59 ngut ki briew kiba la ïap haba la thang ïa ka S-6 Coach jong ka Sabarmati Express ha Godhra, kaba don ha Gujarat, ha kaba kane ka la wanrah ïa ka jingkulmar ha kane ka jylla.
Ki la don bun ki jing-ujor ba la mudui ha ka ïingbishar ba ha khliehduh ban pynibor halor ka rai ba la ai ha u bnai Risaw, 2017 jong ka Gujarat High Court kaba la pynskhem ban pynrem ïa kiba bun ngut ki nongshah pynrem bad pynkylla ïa ka saja ban ïap ha ki kti ka aiñ jong 11 ngut sha ka jingshah set shirta ha patok.
Ka sorkar Gujarat ha u Rymphang, 2023 ka la ïathuh ha ka ïingbishar ba ha khliehduh ba kan pan ïa ka jingpynshitom ban pynïap ha ki kti ka aiñ ïa ki 11 ngut kiba la shah pynrem ïa kiba la pynkylla ïa ka jingpynshitom jong ki ha katei ka mukotduma sha ka jingshah set shirta jingim ha patok da ka High Court.
Haba kane ka mukotduma ka la dei ban bishar ha ki khyndiat sngi jong ka taïew ba la lah, uwei u nongïasaid aiñ, uba la mih na ka bynta uba shah rai pynrem, u la pynpaw ba ym shym la buh satia ïa ki sakhi.
“Ngim tip. La ngin sngap ïa kane ka mukotduma bad ngi la pynshai ïa kane kham ha shwa. Ngim ym pynsangeh ïa kane ka mukotduma. Ïa kane ka mukotduma la pynsangeh noh ym duna ïa ka san sien. (Na ka bynta) shisnem ba la dep, nga la pynsangeh noh ïa kane ka kam,” ong u Justice Maheshwari.
U nongïasaid aiñ u la ïathuh ha ka ïingbishar ba ha khliehduh ba don napdeng ki nongshah rai pynrem kiba la mudui ïa ki jingpan jingmap kiba dang sahteng.
Da kaba kyntait ban pynsangeh noh ïa kane ka kam, ka ïingbishar ka la ong, “Ngi don ki jingbthah na ka ophis jong u Chief Justice ba ïa ki mukotduma jong ka jing-ujor bad jingmap kam donkam ban bishar lang”.
U Senior Advocate u Sanjay Hegde, uba la mih na ka bynta uwei na kiba shah rai pynrem, u la pynpaw ba ïa ka jingujor ba la mudui da ka sorkar Gujarat pyrshah ïa ka jingpynkylla ïa ka jingpynshitom shah pynïap sha ka jingpynshitom ban set shirta ha patok, hap ban bishar shwa.
“Arphew ar snem ki la leit noh… Ki briew jong nga kiba nga ïarap kim shym la ïoh ïa ka rai ban shah pynïap ha ki kti ka aiñ. Kane ka kynhun nongbishar kan hap ban pynthikna shwa ïa ka jingshah lehbeiñ. Shisien ba la pynthikna ïa kata, nangta sa wan ka bynta ban pynshitom. Ynda ngi la ïaid lyngba ïa kata, kata ka lah ban shim por. Kan don ka jingktah lada phi phah sha lai ngut ki nongbishar”, la ong u Hegde.
Nangta ka ïingbishar ka la pynjlan ïa katei ka kam ban bishar haduh ka 13 tarik, u Rymphang hadien ba ki nongïasaid aiñ kiba wan mih na ka bynta ki nongshah rai pynrem ki la pan por.
Ha ka jingbishar hakhmat ka ïingbishar ba ha khliehduh mynshwa, u nongïasaid aiñ jong ka jylla u la ong ba ïa ki 11 ngut kiba shah pynrem la rai ban shah pynïap ha ki kti ka aiñ da ka ïingbishar bad 20 ngut kiwei pat la rai pynrem ban shah set phatok shi jingim halor kane ka mukotduma.
Ka ïingbishar ba ha khliehduh ka la pynskhem ïa ki 31 tylli ki jingshah rai pynrem ha kane ka mukotduma bad ka la pynkylla ïa ka jingpynshitom ban shah pynïap ha ki kti ka aiñ ïa ki 11 ngut kiba la shah rai pynrem sha ka jingpynshitom ban set shi jingim ha patok, la ong u nongïasaid aiñ.
Katba ka jylla ka la ujor pyrshah ïa ka jingpynkylla ïa ka jingpynshitom ban pynïap sha ka jingpynshitom ban set shi jingim ïa ki 11 ngut kiba shah rai pynrem, kiba bun kiba shah pynngat ki la pynibor ïa ka rai jong ka ïingbishar ba ha khliehduh kaba pynskhem ïa ka jingpynshitom jong ki ha kane ka mukotduma.
