UK, K’lyngkot:
Ki bor pyniaid jong ka Britain ki la pyntip ba u Neil Gaiman uba la ju pawnam bha kum u nongthoh kot ba shemphang jong ka Britain, ha kane ka kynti u la shah pynngat kyndon pynkheiñ aiñ halor ka jingbatbor ia ka khynnah trei la jong kaba u buh ban peit khyllung bad kane ruh ka la jia tang hadien ba u la dep shah pynngat teng ha kitei ki jingpharep ha ki khyndiat bnai ba la leit.
Ha katei ka kot ba la ai kyrteng ‘There Is No Safe Word’, ki la mih haduh 8 ngut ki kynthei kiba la pyrshah bad pharep ia u Gaiman ba u don kti ha ka jing-leh bor, ka jingpynngop bad leh sniew ia katei ka kynthei kaba trei kum ka nongiarap ha ka iingsah jong u bad ka kurim ba ar jong u, ka Amanda Palmer.
Katei ka nongtrei ha u Rymphang 2022, ka la phla ba ka ju shah leh sniew bad shah leh khlem-akor ha u Gaiman hapoh New Zealand mynba ka dang don ha ka jaka sum kaba shabar jong ka iingsah jong ki.
Katei ka nongtrei ka la phla ruh ba utei u briew 64 snem, u la batbor ia ka ha ka kamra thiah katba ka dang peit ia u khun jong u ha ka por ba utei u khun u dang lehkai ‘Ipad’ ha kajuh hi ka kamra.
Ka la iathuh ba utei u nongthoh kot, u la bthah ia ka ba ka dei ban shu kohnguh beit ia u kum u kynrad jong ka bad ka dei ban long ka khynnah kaba kohnguh sneng ban pyndep ialade ha kat kaba u bthah.
Katkum ki kaiphod ba la ioh lum, la shem ba baroh kitei ki kynthei kiba u Gaiman u la leh sniew, ki dei hi kiba dang ha ki rta ba 20 snem, ha kaba, kawei na kitei ki khynnah samla lei ka dei kaba dang 18 snem ka rta bad kaba dang shu sdang khie samla. Katba, utei u nongthoh kot pat u dang don ha ki 40 snem ha katei ka por.
Ha u Naitung jong u snem 2024, 5 ngut ki kynthei ki la mih sha khmat ban pyrshah bad pynrem halor kitei ki jingleh sniew jong u Gaiman mynba ki dang trei hapoh jong u.
Kumta, la ong ba ki bor ka aiñ kin dang hap ban wad bniah bad tohkit bniah ia u Gaiman haba iadei bad ka jingphla jong kitei ki 8 ngut ki kynthei kiba la shah batbor bad shah leh sniew ha u mynba ki dang trei bad u ha ki por bad ki snem ba la leit.
