Kabul, K’lyngkot:
U Myntri kam bar ri jong ka Taliban, u la khot ia ki nongialam ba ha khlieh duh jong u ban plie biang noh ia ki skul bad jaka pule na ka bynta ki khynnah kynthei jong ka ri Afghanistan. Namar la ong ba ki paidbah nongshong shnong katei ka ri, ki la pyrshah jur ia ka aiñ ba la pyrkhing ia ki khynnah kynthei ba kin leit pule kumba long ia ki shynrang ha katei ka ri.
U Sher Mohammad Abbas Stanekzai, uba la ialam mynshwa ia ka kynhun ki nongiakren ha ka ophis saiñ pyrthei jong ka Taliban ha Doha ha shwa ba ki shipai U.S. kin mih noh na Afghanistan ha u snem 2021, u la ong ha ka jingkren jong u ha ka sngi kut taiew ba ka jingpyrkhing ia ki khynnah kynthei bad ka jingpule jong ki kynthei kam iahap satia bad ka aiñ Islamic Sharia . .
Kumta, ha katei ka sngi u la kyrpad ïa ki nongïalam jong ka Islamic Emirate ba kin plie ïa ki jingkhang jong ka pule puthi bad ban ym leh shiliang shuh ia ki khynnah bad samla kynthei jong ka ri.
Ki heh ka Taliban ki la ong ba ki burom ïa ka hok jong ki kynthei katkum ba la kdew ruh ha ki aiñ Islam bad ka rukom im jong ki nong Afghanistan.
Namar la ong ba kitei ki aiñ ki kyndon jingpyrkhing jong ki heh ka Taliban, ki la shah kynthoh jur ha ka pyrthei baroh kawei, kynthup ïa ki riew shemphang jong ka jaitbynriew Islam bad ki nongmihkhmat jong ka ri Sepngi ki la ong ba ka Taliban kan ym ioh shuh ia ka jingithuh na kiwei pat ki ri jong ka pyrthei tad haduh ynda kan pynkylla dur noh ia ka rukom synshar bad ki aiñ ki kyndon jongka.
