Taipei, K’lyngkot:
Ka tnat Geological Survey jong ka US, ha ka Sngi Ba-ar ka la pyntip ba u jumai uba 6.0 Magnitude u la pyn -khynñiuh ia ka Taiwan ha katei ka step, ha kaba 27 ngut ki la mynsaw bad utei u jumai u la pynjulor bad pynkad arliang wat ia ki kynroh jong katto katne ki iing ha katei ka step.
La ong ba utei u jumai u la khynñiuh ha ka por shiteng miet jong ka kylla step Sngi Ba-ar bad la lah ban iohsngew ia u naduh kumba 12 Kilometres sha ka phang Shatei jong ka Yujing, kaba long ka thaiñ ba ju rep bun tam eh ia u sohpieng ha Taiwan.
Katkum ki dur bad ki dur-khih ba la saphriang paidbah ha ki rynsan ‘Social Media’, la iohi ia ki briew jong ka kynhun pynlip ding bad ki briew ka tnat iarap, kiba la leit ban pyllait im ia 3 ngut kiba sahkut ha kawei na kitei ki iing ba julor kynthup ia iwei i khynnah rit, kiba la sahkut ha kawei ka iing ba julor hapoh ka distrik Nanxi.
Nalor jong kitei kiba mynsaw na ka jingkhyllem ki kynroh iing bad ka jingtwa ne jing julor ki tnum iing, 2 ngut pat ki dei kiba la ioh pyllait im noh na ka ‘Elevator’ kaba ju ia tip paidbah kum ka ‘Lift’.
Ka tnat ka koit ka khiah jong ka Taiwan, ka la iathuh ba ki don 27 ngut kiba la mynsaw na utei u jumai ha katei ka sngi, katba na ka liang ka tnat pynlip ding jong ka distrik Nanxi, ka la pyntip ba ym shym la ioh jingtip ban don kino-kino ki jing julor ba kham jur hapoh katei ka thaiñ.
Kumjuh, na ka liang ka kompeni TSMC ba paw bha jong ka Taiwan, ka la pyntip ba ka la pynkynriah noh ia ki nongtrei jong ka kiba trei hapoh kito ki karkhana kiba don sha ka phang pdeng bad phang Shathie jong ka ri.
Hynrei, la ong ba ka Taiwan ka ju ioh mad khah-khah ia u jumai namar ka jingdon jongka ha ka bynta jong ka pyrthei, kaba long kloi bha ban shah pynthut ha ki bor ka mariang. Ka Taiwan ka don ha ka bynta kaba ma bha kaba ju khot ka ‘Pacific Ring of Fire’, kaba long ruh ka bynta ba ju ap jingma bha na u jumai.
U jumai ba heh duh ba ka Taiawn ka la ioh mad, ka long ha u Iaiong jong u snem 2024 ba la leit, ha kaba katei ka ri dew lynnong ka la shah pyn khynñiuh ha u jumai uba khlaiñ haduh 7.4 Magnitude bad uba long ruh u jumai uba khlaiñ tam na baroh kiba ka Taiwan ka la ioh mad ha ki 25 snem ba la leit. Ha katei ka jingjia, la don 17 ngut kiba la khlad bad duh ei noh syndon ia ka jingim, ha kaba ki la don ki jingjia twa khyndew bad ki jingtwa jong ki iing- ki sem ha kylleng jong ka Hualien.
La ong ba utei u jumai ba ka Taiwan ka la ioh mad ha u Iaiong jong u snem 2024, u long uba khlaiñ bad ba shyrkhei tam hadien jong u jumai bah uba la pyn khynñiuh ia ka Taiwan ha u snem 1999 ha ka jingkhlaiñ kaba 7.6 Magnitude bad kumba 2,400 tam ki briew ki la khlad ha utei u jumai bah ha utei u snem.
