Jowai, K’lyngkot 21
U MLA ka Jowai bad Chairman ka MUDA, Bah Wailadmiki Shylla ha ka Lah Sngi U Blei u la plie ïa ka Sports Climbing Wall kaba nyngkong eh ha Kiang Nangbah Indoor Sports Hall, Dongmihsngi.
Ïa kane ka Climbing Wall kaba nyngkong eh hapoh ka Jylla, la lah ban wanrah lyngba ka jingïatreilang jong ka Meghalaya State Olympics Association bad ka Meghalaya Sports Climbing and Mountaineering Association.
Nalor u MLA ha kane ka sngi la donlang u President MSOA Bah John F. Kharshiing, u Director ka tnad Sports & Youth Affairs Bah D.D. Shira (MCS), ki nongïalam bad dkhot nongkitkam ka WJDSA ba kynthup u Working President Ma EMH. Passah nalor kiwei kiwei.
U Bah Wailad haba ai jingkren ha katei ka sngi u la pynpaw ka jingkmen bad sngewnguh ïa ka sorkar jylla hapoh ka jingïalam u Myntri Rangbah bad Myntri ka tnad ïalehkai kiba la pynlong ïa kane ka jingthmu kaba jop.
U la pynshlur ruh ïa baroh ki nongïashim bynta ban pyndonkam hok ïa kane ka kabu bad ban trei shitom namar ka jingjop kam ju wan da ka jingsuk bad u khmih lynti ba ka Climbing Wall kan ïarap ïa ki ‘riew don sap ha kane ka jingïalehkai.
