Jowai, K’lyngkot 22
Ka East Khasi Hills District ka la khur ïa baroh lai tylli takma ksiar ha ka jingïalehkai Taekwondo (Poomse) ha ka sngi kaba ar jong ka 6th Meghalaya Games kaba la long ha Seiñraij Indoor Sports Hall kaba ha Jowai.
Ha ka liang ki kynthei ka Nengnunnem Jenevy, Janiya Shamukcham, bad ka Elizabeth Chingnunmawi na EKH ki la ïoh 5.8, 5.5, bad 5.8 poiñ bad bat ïa ka kyrdan ba nyngkong. Katba ka Ri Bhoi ka la khur ïa ka takma rnong, ha kaba ka Pragati Gayary, Preety Subba, bad ka Asha Sunar ki la ïoh 4.5 bad 4.6 poiñ. Ha ka liang ki shynrang, ka WGH ka la khur ïa ka takma rupa da kaba ïoh 5.3, 5.0, bad 5.6 point, katba ka EGH ka la khur ïa ka takma rnong da kaba ïoh 4.5, 5.3, bad 4.1 point.
Ha ka Lead-Climbing (Under-16 girls), ka Dadapbiang Lyngdoh bad ka Aijingsuk Lyngdoh na East Khasi Hills ki la wan ha ka kyrdan ba nyngkong bad ba-ar, bad balai ka Idaseisoh Tongper (WJH).
Ha kawei ka liang ka Dadapbiang Lyngdoh ka la kiew ha ka jingjrong 26+ meter bad pyndep ha ka 2:14 minit, katba ka Aijingsuk Lyngdoh ka la lah ban pyndep hapoh ka 5:00 minit ha ka jingjrong kaba 26 meters. Ka Idaseisoh Tongper ka la pyndep ha ka por 3:07minit ha ka jingjrong kaba 25 meter.
