Shillong, K’lyngkot 23
Ka Sorkar Jylla ka la thmu ban pynlut sa kumba T. 2000 klur tyngka ha kine saw snem ban wan kum shi bynta ban kyntiew ïa ki kam ïalehkai hapoh ka Jylla.
Ïa kane la pynpaw da u Myntri Rangbah ka Jylla, Conrad K. Sangma, ha ka jingïakynduh bad ki lad pathai khubor, ban batai bad ban ai jingtip shuh shuh sha ki paidbah ïa kiei ki thong bad ki mawmer kiba kane ka sorkar ka thmu ban leh ha kine saw snem ban wan.
Kat kum ka jingïathuh u Myntri Rangbah, ha kine saw snem, ka don ïa ka jingthmu ban pynlong ïa kawei na ki rynsan ïakura (boxing) ka ban dei jong ka Boxing Federation of India, ka ïakob king lieng kynda (kayaking & canoe), nangta ar tylli ki jingïalehkai bar ri (international football match) ha kaba kawei kan dei ka jingïalehkai paralok bad kawei pat ka dei ka AFC Cup 2027 (qualifying round) jong ka India pyrshah ïa ka Maldives bad ïa ka Bangladesh ban long ha u Lber mynta u snem.
Hynrei kaba kham heh napdeng ki lympung ïalehkai ba ka sorkar ka thmu ban pynlong ka dei ka National Games 2027.
Haba ïadei pat bad ki jingtei ïa ki jaka ïalehkai, u Myntri Rangbah u la pyntip ba ka jingpynkhreh ïa ka DPR ban tei ïa ka Mawkhanu Sports Complex, ka ban ngiam kumba 40 hajar ngut ki nongpeitkai, ka jaka ban pynlong ïa ki jingïakob siat suloi (shooting range), ka Boxing High Performance Centre, ka jaka sah ki khynnah ïalehkai kynjatbol (residential football academy).
Nalor kine, ka sorkar ka la pynkhreh ruh ban tei ïa ka Mawdiang-diang Sports Complex, kaba la buh thong ban pyndep ha u snem 2026, ka jaka ïalehkai Lawn Tennis.
Shuh shuh, u Myntri Rangbah um lah khlem da pynpaw ka jingsngew sarong ïa ki katto katne ki kam kiba kane ka sorkar kaba mynta ka la lah ban leh ha kaba ïadei bad ka jingtei ïa ki jaka ne ki madan ïalehkai kum ka madan kynjatbol ha JN Stadium, Polo, kaba hajan jong kane ka stadium, ka kam ka dang ïaid shakhmat mynta ïa ka jingpyntrei ïa ka Integrated Hospitality and Sports Complex, ka jingtei bad pynitynnad biang ïa ka P.A. Sangma Sports Complex ha Tura bad ka jingdep ban tei ïa ka Wahïajer Sports Complex ha Wahïajer kaba don ïa ka Synthetic Football Turf bad ka Synthetic Athletic Track.
