Jowai, K’lyngkot 27
Ka Sorkar Jylla ka la rai ban pynsangeh shwa haduh ar snem kynthih ïa ka lympung ïalehkai Meghalaya Games namar ka jingthmu ka long ban ïoh pynlong ïa ka 39th National Games ha u 2027 ha kane ka Jylla.
Ïa kane la pynbna da u Symbud Myntri Rangbah ka Jylla u Bah Sniawbhalang Dhar ha ka jingpynhap pyrda ïa ka 6th Meghalaya Games ha ka sngi Saitjaiñ ha Kiang Nangbah Stadium, Jowai.
“Kumba long mynta ngim pat thikna ban pynlong ïa ka Meghalaya Games namar ngi dang ïakhun ban wanrah ïa ka National Games ha u snem 2027 hapoh ka jylla ka jong ngi,” u la bynrap.
“Lada ngi ïoh ban pynlong ïa ka National Games, la kumno-kumno ar snem shiteng ngi donkam ka jingpynkhreh ïa ki jaka ïalehkai kiba biang khnang ba ka jingïalehkai kan long kaba jop kumba jop ka 6th Meghalaya Games hapoh West Jaiñtia Hills.”
Kumba ka long mynta dei tang ka East Khasi, West Garo bad ka West Jaiñtia Hills kiba la ïoh ban pynlong ïa ka Meghalaya Games ha kine snem ba la dep, katba kiwei pat ki district ki dang hap ap ban ïoh pynlong khnang ba kin ïoh ïa ki jingmyntoi ha ka liang ki stadium, ki indoor stadium bad kiwei ki jaka ïalehkai kiba paka ryngkat ki tiar ïalehkai.
Wat la ha ka sngi plie ïa ka 6th Meghalaya Games ha Wahïajer, na ka liang u Myntri Rangbah ka Jylla u Conrad K. Sangma u la pynpaw ïa ka jingthrang ban pynlong ha baroh ki district jong ka Jylla, hynrei ïa mynta kiwei ki district kin hap ban ap hadien u snem 2027 ba kin ïoh ban pynlong ïa katei ka lympung ïalehkai kaba heh ha ka Jylla.
