Shillong, K’lyngkot 27
Ka lympung ïalehkai Second Division Shillong Cricket League 2024/25 ba la pynïaid da ka Shillong Cricket Association ka la nangjam shaphang ha kaba ka Lawsohtun bad ka Nongpdeng CC ki la ïoh jingjop ha ka Lah Sngi U Blei.
Ha kane ka jingïakhun, ka Lawsohtun ka la pynliem noh ïa ka Metallica da 8 wiket. Ka Lawsohtun kaba la jop kynting pisa, ka la ailad shwa ïa ka Metallica ba kan tied nyngkong ha kaba ka la ïoh 129 run bad shah pynhap 8 wiket ha ki 20 over. U Rahul Barua u la tied 36 run na ki 26 bol bad u Bicky Raj Das u la ïoh 21 run na ki 16 bol. Katba u Andrew B Thabah u la shim 2 wiket bad shi wiket da u Greatestfull Lyngkhoi na ka bynta ka Lawsontun.
Haba wan shimti ïa ka pali ba ar, ka Lawsohtun ka la kynjoh sha ka thong da kaba ïoh 133 run bad shah pynhap 2 wiket ha ki 17.4 over. Kane ka la wan urlong lyngba ka jingïalehkai bha u Kynsai Lyngkhoi uba la khyrwit ïa ka shiteng spah kaba 56 run na ki 57 bol bad u Chongtre I Man u la ïoh 47 run na ki 30 bol. Katba u Robin Singh u la shim 1 wiket na ka bynta ka Metallica. Ïa ka nam Player of the Match la khur da u Kynsai Lyngkhoi.
Haba phai sha kawei pat ka jingïakhun ba ar, ka Nongpdeng CC ka la jop da 79 run ïa ka Jersy King. Ka Nongpdeng kaba la shimti ban tied nyngkong, ka la ïoh 200 run bad shah pynhap 5 wiket ha ki 20 over. U Maitshaphrang Khongjee u la khyrwit ïa ka shiteng spah run kaba 50 na ki 20 bol bad u Teiborlang Dhar u la ïoh 36 run na ki 21 bol. Katba u Raj Biswa u la shim 2 wiket bad 1 wiket da u Krishna Thapa na ka bynta ka Jersey King.
Haba wan beh ïa ka thong, ka Jersey King ka la ïoh tang 121 run bad shah pynhap 8 wiket ha ki 20 over. U Sunil Gurung u la tied 48 run na ki 35 bol bad u Gopal Sunar u la ïoh 36 run na ki 25 bol. Katba u Donboklang Hoojan bad u Sanki Dhar ki la shim mar 2 wiket na ka bynta ka Nongpdeng. Ïa ka nam Player of the Match la ïohpdiang da u Maitshaphrang Khongjee.
