Dehradun, Kyllalyngkot:
Ka Uttarakhand ha ka Lah Sngi U Blei, ka la long ka jylla kaba nyngkong eh ha ka ri ban pyntreikam ïa ka Uniform Civil Code (UCC) ha kaba ka BJP kaba bat ïa ka jingsynshar ka la pyndep ïa ka jingkular kaba khraw kaba la kular shwa ka ilekshon Assembly jong u snem 2022.
Ka UCC ka la treikam ha ka por ba u Myntri Rangbah ka jylla u Pushkar Singh Dhami u la pyllait paidbah ïa ka jingpynbna jong u, u la pyllait ïa ki kyndon ban pyntreikam ïa ka bad u la plie ïa ka Portal ba la shna na ka bynta ka jingpynrung kyrteng Online kaba donkam bha ïa ki jingïathoh, ki jingpyllait san shyieng bad ki jingdon jingïadei.
“Ka UCC, kaba thaw ïa ki aiñ kiba ïaryngkat na ka bynta iwei-pa-iwei nongshong shnong ha baroh ki jait niam, ka treikam pura ha kane ka khyllipmat. Ka burom na ka bynta jong ka ka leit pura sha ki paidbah ka jylla,” ong u Dhami ha ka jingïalang hangne. Ka dei ka atiar ban pynkut noh ïa baroh ki jinglehbeiñ ïa ki kynthei khlem da kheiñ ïa ka niam jong ki, u la ong.
Ka dei ruh ka jingpyndep ïa ka jingkular kaba kongsan shwa ka jingthep vote kaba la ai da u Dhami ha ka por ilekshon Assembly jong u snem 2022 kaba la ïohi ïa ka BJP ba kan bat ïa ka bor ha ka samoi treikam kaba ar. Ka kynhun jong ki riewshemphang ba la khlieh da ka nongbishar jong ka Supreme Court ka Ranjana Prakash Desai la seng ha ka 27 tarik, Jymmang, 2022, na ka bynta ban pynkhreh ïa ka Draft jong ka UCC.
Ka kynhun ba la khlieh da ka Desai ka la aiti ïa ka Draft ba bniah jong ka UCC ba la pynkhreh hadien ka jingïakren kaba slem bad ki briew kiba ïaid lyngba sha ka sorkar jylla ha ka 2 tarik, Rymphang, 2024.
Ïa ka aiñ halor jong ka la mynjur hadien katto katne sngi da ka ïingdorbar ka jylla ha ka 7 tarik, Rymphang. La ai ïa ka jingmynjur jong ka President hadien jan shibnai kaba plie lad ban pyntreikam ïa ka. Ka UCC ka treikam ïa baroh ki nongshong shnong jong ka Uttarakhand, lait noh tang ki Scheduled Tribe bad ki briew bad ki kynhun jaitbynriew ba la ïoh jingïada na ki heh ba dei khmih.
U Dhami ha ka Lah Sngi U Blei, u la pynpaw ka jingsngewnguh ïa ki nongshong shnong ka jylla bad ïa u Myntri Rangbahduh ka ri u Narendra Modi. Haba kren sha ki nongthoh khubor ha kane ka sngi, u Dhami u la ong, “Nga pynpaw ïa ka jingsngewnguh sha ki paidbah ka Uttarakhand bad nga ai khublei ïa u Myntri Rangbahduh katba ngi dang pyndep ïa ka jingkular kaba ngi la khlei… ngi la leh ïa kane ka kam halor ka jingkyrkhu jong ki nongshong shnong ka jylla kiba la ai lad ïa ngi ban thaw sorkar. La ka dei ka komiti ka UCC, u Modi ne u Myntri ka tnat ki kam pohïing u Amit Shah, nga pynpaw ka jingsngewnguh ïa baroh.”
