Shillong, K’lyngkot 28
Ka Laitkor SC ka la pynliem noh ïa ka Sawmer SC da 2-1 kol ha ka lympung ïalehkai Shillong Premier League 2024 kaba la long ha ka Sngi Ba-ar ha SSA Stadium kaba ha First Ground, Polo.
Kane ka nam jop ka la wan urlong lyngba ki ar kol ba la thep da u Samborwell Mynsong (5 & 18) ha shwa ba u Shanmeiaki Warlarpih (32) un pynphai kylla na ka bynta ka Sawmer.
Kumba ka long mynta kane ka long ka jingjop kaba ar ïa ka Laitkor namar ha ka wat kaba nyngkong ka la jop teng ïa ka Sawmer da 2-0 kol ha ka 28 tarik u Risaw.
Ha kajuh ka por kane ka long ka sien ba ar ïa ka Laitkor ban jop ha ka wat ba ar jong kane ka lympung bad ha ka jingïalehkai ba la dep ka la jop da 4-0 kol ïa ka Nongthymmai SC.
Te kumta lyngba kane ka jingjop ka Laitkor ka la jam sha ka kyrdan ba saw ryngkat 16 point hadien ba ka la jop san sien, ïakhaid shisien bad shah rem san sien.
Ha kawei pat ka liang ka Sawmer ka la don hapdeng ka jingeh namar ka la shah rem san sien lynter. Mynta kane ka kynhun ka la don ha ka kyrdan ba hynñiew ryngkat 11 point hadien ba ka la jop lai sien, ïakhaid ar sien bad shah rem hynriew sien.
Ka jingïalehkai ha ka Sngi Balang kan long hapdeng ka Nongthymmai pyrshah ïa ka Langsning FC ha ka por 2:30 nohphai sngi.
