Thiruvananthapuram:
Naba ka seng ka la shah khmih bniah ha kaba ïadei bad ka jingjahburom kaba khraw, ka Lah Sngi U Blei, ka la dei ka sngi jong ka jingbishar bniah bad jingkhuslai ïa ka kynhun jong ka seng BJP ha ka jylla Kerala. Ki 8 ngut ki Councillor jong ka Municipal ha Palakkad kynthup ïa ka Chairperson ki la rai ban iehnoh ïa ka kam, kaba la pynlong ïa ki nongïalam ban lyngngoh namar ba ka jingduh noh ïa ka bor synshar ha Palakkad kan jin da la long ka jingpynïap ïalade ïa ka seng. Hynrei ha kaba kut jong ka sngi, ka kynhun jong ka BJP ka la sngew shngaiñ namar ba ka RSS ka la tuklar bad pynthikna ïa kine ki riewpyrshah seng ba ïa ki jingeh jong ki yn sa rah sha ka miej jong ki nongïalam ka ri.
Ka jingkhihwin kaba kynsan kynsan ka la long na ka jingthung ïa u Prasanth Sivan kum u President jong ka seng ha Palakkad East. Ka Chairperson jong ka Palakkad Municipality, ka Prameela Sasidharan, ka dkhot jong ka National Council, u N Sivarajan bad u nongbuh pisa jong ka jylla, u E Krishnadas, ki dei napdeng ki nongïalam kiba la rai ban iehnoh kam.
“Ki hynriew ngut ki briew ki la ïakhun ïa lai tylli ki kam balait ha ka distrik Palakkad. Ïa ka kyrteng jong ki lai ngut, kiba ïoh bun ki vote, la phah sha Delhi. Ka la don ka jingkhih mynsiem namar ba u briew uba hynñiew, u bym don ha ka jingïakhun, u la shah thung kum u President jong ka Palakkad East District. Ki nongïalam ka RSS ki la tuklar bad pynsngewthuh ïa ngi”, la ong uwei u heh nongïalam jong ka BJP na Palakkad ha ki nongthoh khubor. U la ong ba ki nong-ialam ka RSS ki ïasam ïa ki jingeh jong ki.
“Ki la pynthikna ban shim ïa ka ha ka kynhun kaba dei. Ym shym la don kano kano ka rai ban iehnohkam na ka seng. Ngi ki shynrang jong ka BJP ngi ïeng na ka bynta ki katto katne ki jinglong bad ngim lah ban shim ïa ki rai kiba don ha ka jingsngew”, u la ong. “La khot ïa ka jingïalang jong ki nongïalam bym sngewhun ban pynsngewthuh ïa ki”, la ong u nongïalam.Ha kajuh ka por, u K Surendran President ka BJP ha ka jylla u la kyntait ïa ki khubor ba don ka jingeh ha ka seng. Ym don mano-mano ruh ban mih na ka seng, u la ong.
Ka jingeh ha Palakkad ka la wan ha ka por ba ki seng ba la ïatreilang bad ka kynhun NDA ki la pynmih ïa ka sur pyrshah, da kaba kynnoh ba ka don ka jingleh arsap bad ka jinglong hynmen rangbah na ka liang ki nongïalam jong ka BJP ka jylla.
Ha ka sngi U Blei, ka jingïalang jong ka Kottayam District Committee jong ka Bharath Dharma Jana Sena (BDJS) ka la mynjur ïa ka rai kaba kyntu ïa ki nongïalam ka jylla ban mih noh na ka NDA bad ban wad ïa ki lad ki lynti ban ïasoh bad ka LDF ne ka UDF. Ka rai ka la ong ba ki nongïalam ka BJP kim shym la lah ban pyntreikam ïa ki jingkular ba la ai sha ka seng, kynthup ïa ki kam Chairman ha ki bor sorkar bapher bapher.
“Ka seng kaba la pynïasoh bad ka kynhun NDA khyndai snem mynshwa ka la ïarap ban pynïar ïa ka nongrim jingkyrshan, da kaba wanrah ïa ki jaitbynriew kiba sahdien sha khmat. Hynrei ki nongïalam jylla jong ka BJP kim nud wat ban ïakren ïa ki mat ba ïadei bad ki kam saiñ pyrthei bad ki seng ba la ïatreilang bad ka. Ha kum kine ki jinglong jingman, ka seng ka dei ban wad ïa ki lad ki lynti ban ïasoh bad ka LDF ne ka UDF,” ong ka rai.
Katkum ka jingong ki nongïalam ba hakhliehduh jong ka BDJS, lajan baroh ki District Committee ki la pynpaw ïa ka jingbym sngewtynnad ban bteng ha ka kynhun NDA. Hynrei u President ka BDJS u Thushar Vellappally u la ong ba kam don kano kano ka jingkhih ban mih noh na ka kynhun NDA.
“Ki don ki nongïalam ha ka kynhun na ka thaiñ kiba la pynpaw ïa ki jingai jingmut hynrei ka seng kam shym la pyrkhat satia ban mih noh na ka kynhun NDA. Ka Party State Executive kan shong jingïalang ha ka 1 tarik, Rymphang bad yn sa ïakren ïa ki jingjia kiba la wanrah ïa kane ka rai. Ka BJP ka la ai ïa ngi katto katne ki shuki ba lait bad kam don kano kano ka jingïapher jingmut. Ngim shym la rung sha ka kynhun NDA na ka bynta ki kam bad ym lah ban buh jingkylli ïa ka jinglong jingman jong ngi ha ka liang ka jingmut jingpyrkhat”, u la ong.
Ka jingïalang jong kiwei pat ki seng ba la ïatreilang hapoh ka kynhun NDA ha Kerala — kynthup ïa ka Kamaraj Congress ba la ïalam da u Vishnupuram Chandrasekharan bad ka Janadhipathya Rashtreeya Sabha jong u C K Janu — ka la ïakynduh ha ka taïew ba la lah bad ki la pynpaw ïa ka jingsngewkhia jong ki halor ka jinglong heh kti jong ki nongïalam ka BJP jong ka jylla. Katkum ki tyllong khubor, la ong ba ki seng kiba ïatreilang ki la rai ban weng noh ïa ka jingïadei bad ka NDA hynrei ki la pynjlan ïa katei ka rai haduh 15 sngi hadien ba u State in-charge ka BJP u Prakash Javadekar un shim ïa ka jingtuklar.
