Shillong, K’lyngkot 29
U Andrey Chernyshov ha ka Sngi Balang u la iehnoh ïa ka kam kum u coach ka Mohammedan Sporting da kaba u la pynpaw ba um shym la ïoh ïa ka tulop la lai bnai bad kane ka long hadien lai sngi shwa ba kan ïakynduh pyrshah ïa ka kynhun ba khlaiñ bor na Kolkata, ka Mohun Bagan.
Une u coach na Russia, uba la btin lynti ïa ka Mohammedan Sporting ban rah ïa ka nam lahduh jong ka I-League ha ka samoi ïalehkai ba la dep, u la pynbna ïa ka jingmih noh jong u da kaba pynpaw halor rynsan social media.
“Ko paralok baïeid jong nga, ki nongkyrshan jong ka klob. Mynta ka sngi ka dei ka sngi kaba sngewsih shibun eh ïa nga. Nga hap ban hiar shuki kum u head coach jong ka MSC bad la pynkut noh ïa ka jingïateh jong nga namar ba ngam shym la pyndep ïa ki kyndon jong ka klob. Ki jingjia ki pynbor ïa nga ban shim ïa kane ka rai kaba eh bha. Kane ka dei ka rai kaba eh tam bad kaba sngewsih tam ha ka jingim jong nga kum u coach,” pynpaw u Chernyshov ha ka Instagram.
“Kum u nongïalehkai ba tbit, ngam lah ban trei lai bnai khlem da ïoh tulop. Ngan ym kren mynta shaphang ki jingeh kiba ngi, ki nongïalehkai, ki coach bad ki nongtrei ngi la hap ban ïaid ha kane ka samoi. Ngam ju tieng ïa ki jingeh bad nga ju mih shabar ban pynpaw haba phi ki nongthoh khubor phi kwah ban ïakren bad nga. Hynrei ha kane ka kynhun ngam lah ban bteng nga la shim ïa kane ka rai da ki jingjaw ummat ha ki khmat. Hynrei ki jingkynnoh baroh ki leit sha ki bor pynïaid jong ka klob, ki bym shym la pyndep ïa ki kyndon jong ka jingïateh kular.”
Uwei na ki heh jong ka Mohammedan Sporting SC u la pynpaw, “Ngi la ïoh khubor na kawei pat ka tyllong khubor ba u Chernyshov u la ujor sha ka FIFA ha kaba ïadei bad ka jinglong-jingman jong ka klob bad ka jingeh ha ka jingsiew ïa ki nongïalehkai khlem da pyntip sha ngi. Hynrei ngim pat ïoh kano-kano ka jingpynbna ba thikna na ka FIFA ha kaba ïadei bad kane ka kam.”
La sngewthuh ba ka klob mynta kam pat don kano-kano ka jingthmu ban thung ïa u coach bathymmai. Ïa mynta shipor, u Asst. Coach Mehrajuddin Wadoo un shimti kum u coach shipor ban pynïaid ïa kane ka klob haduh kaba kut ka aïom ïalehkai.
Haba shim bynta ha ka sngi kaba nyngkong ha ka lympung ïalehkai ISL, ka Mohammedan Sporting ka la jop tang ar tylli ki jingïakhun bad ïakhaid phra sien, ha kaba shong mynta ka la don ha ka kyrdan ba shatrai duh jong ka miej ïakheiñ point. Hapdeng kane ka jingïakynad, kane ka klob kan ïakhun pyrshah ïa ka Mohun Bagan ha ka 1 tarik u Rymphang.
