New York, K’lyngkot:
Katkum ki khubor, la ong ba ki nongialam jong ka jaitbynriew Sikh ha US ki la iathuh ba kam shym don kano-kano ka jing-leit khynra jong ki bor pyniaid ka US ia ki nong Gurdwara kumba la iohi ia ki khubor ha kine ki sngi ba la leit.
U Sukhjinder Singh Nijjar, uba don ha Richmond Hill Gurdwara ha New York, kaba dei ka jaka ba kongsan jong ki Sikh, ha ka Sngi U Blei, u la ong ba ia ki jingiaseng duwai la pynlong da ka jingburom bad kam shym la don kano-kano ka jingshah pynwit-pynthud ne jingshah khanglad hangno- hangno ruh.
Kumta ha katei ka khubor kaba u la pyllait paidbah ha ka step Sngi Ba-ar, u Sukhjinder u la iathuh ba kam shym la don kano- kano ruh ka jingleit khynra lane kino- kino ki jing pyntreikam aiñ ha kiwei pat ki Gurdwara ha New York bad ha New Jersey ruh kumjuh bad la ong ba utei u nongialam u dei uba ju iadon lang bad ka Sikh Cultural Society kaba mihkhmat ia ka Coastal Northeast bad uba la long u Chairman jong ka komiti paidbah bad ki lad pathai khubor jong ka.
Namarkata, utei u nongialam u la ong ba kane ka khubor ka long tang ka khubor lamler kaba pur na kito ki bym iasngewthuh jingmut bad kito kiba ju sngewtynnad ban pynmih ia ki khubor thok tang ban ioh pyniapher jingmut para briew bad ban pynshit jaitbynriew.
Namar u la ong ruh ba ki jaidbynriew Sikh ha New York bad ha New Jersey ki don ka jingïadei kaba bha bad baroh ki kyrdan jong ki nongmihkhmat jong ka sorkar US, kynthup ïa ka tnat Justice bad ka White House.
