Shillong, K’lyngkot 30
Ka lympung ïalehkai Third Division Shillong Cricket League 2024-25 ka la nangjam shaphrang ha ka Sngi Palei ha kaba ka Elite XI bad ka Shillong Sixer ki la ïoh jingjop ha madan Urkaliar, Shillong.
Ha ka jingïakhun kaba nyngkong, ka Elite XI ka la pynliem noh ïa ka Blaze Brigade da 6 wiket. Ka Blaze Brigade kaba la kam trai ban tied nyngkong ka la tied 150 run bad shah pynhap 10 wiket ha ki 20 over. U Amar Chaudhary u la ïoh 36 run na ki 33 bol bad u Poimi Jjs Pasi u la ïoh 18 run na ki 17 bol. Katba u Balaji bad u Jetu Daimary ki la shim mar 2 wiket na ka bynta ka Elite.
Haba wan shimti ïa ka pali ba ar, ka Elite XI ka la lah ban kynjoh sha ka thong da kaba ïoh 151 run bad shah pynhap 4 wiket ha ki 14.5 over. Kane ka la wan lyngba ka jingïaleh-kai bha u Ujjal Singh uba la lah ban tied 79 run na ki 39 bol bad u Shubham Thakur u la ïoh 35 run na ki 22 bol. Katba u Wanaibok bad u Hilarious Khonglah ki la shim mar 1 wiket na ka bynta ka Blaze Brigade. Ïa ka nam ‘Player of the Match’ la ïohpdiang da u Ujjal Singh.
Haba phai sha kawei pat ka jingïakhun ba ar, ka Shillong Sixer ka la jop da 6 run ïa ka SCA ‘A’. Ka Shillong Sixer kaba la shimti ban tied nyngkong, ka la ïoh 160 run bad shah pynhap 4 wiket ha ki 20 over. U Fernando Bareh uba la jan ïoh ïa ka shispah run hynrei u la ïoh tang 91 na ki 57 bol bad u Amir Shiekh u la ïoh 29 run na ki 23 bol. Katba u Sagar Solanki u la shim 2 wiket bad shi wiket da u Amul Kumar na ka bynta ka SCA.
Haba wan beh ïa ka thong, ka SCA ‘A’ ka la ïoh tang 154 run bad shah pynhap 3 wiket ha ki 20 over. U Sameer Choudhary u la tied 44 run na ki 34 bol bad u Prince Ray u la ïoh 28 run na ki 16 bol. Katba u Sumeet Gurung u la shim 2 wiket bad shi wiket da u Sandeep Roy na ka bynta ka Shillong Sixer. Ïa ka nam ‘Player of the Match’ la ïohpdiang da u Fernando Bareh.
