Shillong, K’lyngkot 30
U Steven Gerrard, rangïalehkai ba pawnam jong ka England bad Liverpool, u la hiar shuki kum u coach jong ka Al-Ettifaq da ka jingïamynjur lang, la pynbna ka klob jong ka Saudi Arabia ha ka Sngi Palei.
“U Gerrard u la burom ïa ka klob bad un ym lah ban klet ïa ka. Kane ka rai kaba ngi la mynjur lang ka long na ka bynta ka jingbha jong baroh ar hapdeng u Steven bad ka klob,” ong u president ka klob u Samer Al Mishal.
“Nga kwah ban pynpaw ïa ka jingsngewnguh ïa ka klob, ki nongïalehkai, ki nongkyrshan, bad baroh kiba donkti na ka bynta ka lad bad ka jingkyrshan ha ka por ba nga don hangne. Nga la ïoh jinghikai shibun, bad ka la long ka jingïakynduh kaba bha ha lade bad na ka bynta ka ïing ka sem jong nga kumjuh. Hynrei ka phutbol ka long kaba ym lah ban tip, bad teng teng kiei kiei kim ïaid katkum ka jingkwah jong ngi,” la pynpaw u Gerrard ha ka kyrwoh ba la pyllait hynne ka sngi.
U Gerrard u la soi bad katei ka klob hadien ba u la shah pynduh jingkyrmen ha ka klob jong ka English Premier League, ka Aston Villa kaba la pynlong ïa u ban shah weng noh hadien ba ka la jop tang ar sien na khatar tylli ki jingïalehkai jong ka samoi ïalehkai 2022-23. Shwa ba un soi bad ka Villa, u Gerrard u la ïalam lynti ïa ka Rangers ban rah nam lahduh kaba nyngkong eh ha ka Scottish Premiership hadien shiphew snem.
Hadien ba u la don bad katei ka klob na Saudi, u Gerrard um shym la lah ban pynurlong naduh ba u la pynïasoh ha u Naitung jong u 2023 ha ka jingïateh kular kaba ar snem. Ha ka lympung ïalehkai jong ka Saudi Pro League mynta ka aïom, ka Al-Ettifaq ka don ha ka kyrdan kaba khatar da kaba jop tang ar sien bad shah rem phra sien ha khatsaw tylli ki jingïalehkai.
