Shillong, K’lyngkot 30
Ka Manipur ka la long tang ma ka napdeng ki jylla ka thaiñ Shatei Lam Mihngi ban pynpaw ïa ka jingtbit ha ka 36th National Games kaba dang jam shaphrang ha Uttarakhand.
Kane ka Jylla ka la lah ban khur phra tylli ki takma kiba kynthup ïa saw tylli ki takma ksiar bad saw tylli ki takma rupa na ka bynta ban wan ha ka kyrdan ba-ar kata hadien ïa ka Karnataka kaba don ha khlieh duh.
U Sarungbam Athouba Meitei u la khur ïa ka takma ksiar kaba nyngkong eh na ka bynta ka Manipur ha ka men’s individual Triathlon. Te kumta une u rangïalehkai u la ïasoh lang bad kiwei kiba la khur takma ksiar kynthup ïa ka Tongbram Saya bad ka Laxmi, kiba la ïoh jingjop ha ka liang ki kynthei bad u Bonisana ha ka liang ki shynrang ha ka jingïalehkai Wushu.
Katba ka Karnataka kaba dang lamkhmat ha kane ka lympung, ka la khur hynñiew tylli ki takma kiba kynthup ïa 5 tylli ki takma ksiar lem bad 2 tylli ki takma rupa.
Ïa ka kyrdan balai la bat da ka Maharashtra kaba la khur 8 tylli ki takma (2 ki takma ksiar, 3 ki takma rupa bad 3 ki takma rnong).
Kiwei pat ki la bud nadien ha ka jingïoh ban khur takma ki long ka Services Sports Control Board, Tamil Nadu, Delhi, Madhya Pradesh, Kerala, Odisha, Uttarakhand, Bihar, Gujarat bad ka West Bengal.
Kumba ka long mynta kane ka lympung ka dang ïaid shaphrang bad kumta ki nongïalehkai jong baroh ki jylla ki dang pyrshang ban ïalehkai bha khnang ba kin lah ban pynurlong ha ka ban khur takma.
Haba phai sha ka Meghalaya, ka la phah ïa ki kynhun ïalehkai ban shim bynta ha katei ka lympung ka ban kut haduh ka 14 tarik u Rymphang. Kine ki kynthup ïa ka Shooting, Athletics, Judo, Archery, Rowing, Wushu, Aquatics, Canoeing & Kayaking bad ka Boxing.
