
Gaza City, K’lyngkot:
U nongmihkhmat jong u President ka US, u Steve Witkoff ha ka Sngi Palei haba iakren shaphang ka jinglong- jingman hapoh nongbah Gaza, u la ong ba ka nongbah Gaza ka la jan thylli bad um lut bad la jan ym don eiei shuh syndon bad lada kwah ban tei bad khyllie biang pat ïa katei ka jaka ba la shah pynjulor ha ka thma, ka lah ban shim por haduh kumba 10 lane 15 snem.
U Witkoff, u nongbei tyngka ha ka kam die jaka bad u nongbei tyngka ha ka jingïalap elekshon jong u Trump, uba don ka jingïadei ha ka kam khaii bad ka Qatar bad kiwei ki ri jong ka Gulf, u la don ha kane ka thaiñ ban peit ïa ka jingpyntreikam ïa ka jingïateh kular ban sangeh ïasiat hapdeng ka Israel bad ka kynhun lehnoh jong ka Palestine, ka Hamas.
Kano kano ka jingai jingmut ba ki nong Palestine kin mih noh na Gaza, ka jaka kaba ki kwah ban long shi bynta jong ka ri laitluid, ka la long ka jingtim ïa ki nongïalam jong ka Palestine la bun pateng bad la kyntait bunsien da ki ri Arab ba marjan naduh ba ka thma Gaza ka la sdang ha u bnai Risaw 2023.
U Witkoff u la ïathuh ha ka Axios ba um shym la ïakren bad u Trump halor ka jingmut ban pynkynriah noh ïa ki nong Palestine na Gaza.
Ka jingkheiñ jingdiah jong ka U.N., kaba la pynmih mynta u bnai, ka la pyni ba ka jingpynkhuid ïa palat 50 million ton ki mawshun kiba la sah hadien ka jingbthei bom jong ka Israel, ka lah ban shim por 21 snem bad kan shongdor haduh $1.2 billion.
La ngeit ba kitei ki jaboh ki dei kiba la pynsniew da u mawshun, ha kaba la tip ba ki don ki jaka sah phetwir kiba la shah ktah ha ka por thma, ba la shna da katei ka tiar. Ki tnum ruh ki lah ban bat ia ki shyieng briew. Ka tnad ka koit ka khiah jong ka Palestine, ka khein ba ki don 10,000 tylli ki met iap, kiba la jah rngai hapoh ki thliew.