Dang lamkhmat ka Karnataka & Manipur, hiar ka SSCB sha kyrdan basaw

Katei ka Nandao ka dei ka jingïalehkai kilanmet talaiñ wait kaba tang marwei bad na ka liang ki nongbishar kin sa bishar halor ka jinglah ka jong ki.  

Shillong, K’lyngkot 31

Ka kynhun ïalehkai ka Jylla kam pat shym la lah ban khur wat tang kawei ka takma ha ka sngi ba lai jong ka 38th National Games kaba dang ïaid shaphrang ha Uttarakhand, katba ka Karnataka bad ka Manipur ki la ïai bteng ban lamkhmat ha kane ka lympung.

Kat kum ka jingpynpaw u General Secretary ka Meghalaya State Olympic Association (MSOA), Bah Finely Lad Pariat, u la ïathuh ba ka Meghalaya ka dang lah ban pyndep ïa ar tylli ki jingïalehkai kiba kynthup ïa ka Shooting bad ka Wushu, hynrei sniew bok ba ka Wushu ka la lait shi khnam ban khur ïa ka takma rnong hadien ba ka la wan ha ka kyrdan basaw.

“Ha ka jingshisha u Kyrshanbor Romeo Songthiang u la lah ban ïalehkai bha ha ka Wushu (Nandao) ha ka Sngi Palei, hynrei sniew bok ba u la wan ha ka kyrdan basaw napdeng shiphew ngut ki nongïalehkai kiba la don hapoh ka thup kaba shiphew,” la ong u Bah Pariat.

Katei ka Nandao ka dei ka jingïalehkai kilanmet talaiñ wait kaba tang marwei bad na ka liang ki nongbishar kin sa bishar halor ka jinglah ka jong ki.  

Haduh kane ka sngi kaba ar ka Karnataka ka dang ïai bat ïa ka kyrdan ba harjong hadien ba ka la khur 12 tylli ki takma, kiba kynthup ïa 7 ki ksiar, 3 ki rupa bad 2 ki rnong. Nangta bud sa ka Manipur kaba la khur 11 ki takma (6 ki ksiar bad 5 ki rnong). Ïa ka kyrdan balai la bat da ka Maharashtra kaba la khur 23 tylli ki takma (4 ki ksiar, 11 ki rupa bad 8 ki rnong). Katba ka Services Sports Control Board (SSCB) ka la hiar sha ka kyrdan basaw da kaba khur 9 tylli ki takma (4 ki ksiar, 4 ki rupa bad kawei ka takma rnong).

Wat la ha ka Sngi Palei ka dang paw tang ka Manipur na ka thaiñ shatei lam mihngi kaba la lah ban khur takma, hynrei mynta ka sngi la wan mih paw sa ka jylla Assam kaba la khur kawei ka takma rupa.