
Shillong, K’lyngkot 31
Ka Mawlai bad ka Shillong Lajong ki long ba la pynkhreh ban ïaknieh ïa ka nam lahduh ha ka 4th Meghalaya State League 2024 ka ban long ha ka Sngi Saitjaiñ ha Wahïajer Multipurpose Sports Complex ha ka por 1 baje mynsngi.
Kane ka jingïalehkai ka lah ban long kaba kham itynnad namar baroh ar tylli kynhun ki dei kiba khlaiñ bor jong ka Shillong Premier League ba la pynïaid da ka Shillong Sports Association.
Kumta kane ka lympung ka wanphai biang sha ka jaka ba ka la sdang mynta ka samoi, ha kaba ka Lajong ka la ïakhun pyrshah ïa ka Niaw Wasa United kaba la jop ha ka sien kaba nyngkong ha u Risaw mynshem snem. Da kaba wanrah lang ïa ki kynhun kiba la jop na ki league jong ki synjuk ïalehkai bapher bapher kiba don ha ki district kiba pynïasoh bad ka Meghalaya Football Association, te kumta 24 tylli ki klob ki la sdang ïa ka jingïaid lynti jong ki bad mynta sah sa tang ar tylli ki kynhun kiba kynsai ki ban shim ïa ka rai kum ka lahduh.
Kumba ka paw ka Mawlai kam pat ju ïoh rung sha ka phainal ha ka MSL. Ha ka aïom ba la dep (2023) ka la sha rem noh ha ka semi final ha ka Khliehmawlieh. Kumjuh ka Lajong ka la shah rem noh ha ka semi final jong utei hi u snem ha ka Rangdajied United bad ban long ka lahduh. Kham ha shwa ka SLFC ka la lah ban rah ïa ka nam lahduh ha u snem 2019 bad ïa kane lympung la bei tyngka da ka Sorkar Jylla naduh u snem 2017.
Kumta ka Mawlai bad ka Lajong kim pat ju ïakynduh ha kane ka lympung hynrei ki la ïakynduh teng ha ka wat nyngkong jong ka Shillong Premier League ha u Naiwieng mynshem snem bad kut da ka jingïakhaid mar 1-1 kol.
Haba pynpaw sha ki lad pathai khubor shisngi shwa ban sdang kane ka jingïakhun final, ki asst. coach ka Lajong bad ka Mawlai kata u Milan Nongkhlaw bad u Teibor Dohling ki la pynpaw ka jingkhmih lynti ban ïoh ïa ka jingjop ha kane ka jingïakhun.
“Ngi la pynkhreh ïa ka snem ba la dep baroh kawei na ka bynta kane ka khyllipmat,” la ong u Bah Nongkhlaw. “Ha ka jingïakhun semi-final pyrshah ïa ka Rymbai Shkenshynriah, ki khynnah jong ngi ki la ïalehkai bha bad kane ka long ka jingpynkhreh kaba biang ban ïa tynjuh bor bad ka Mawlai kaba dei kawei na ki kynhun ba la tbit bha ha ka Jylla. Ngi sngewthuh bha ba ka long kaba khlaiñ bor bad ngi long kiba la khreh.”
Uwei pat u dkhot ka Lajong, Bah Rohit Nongspung (goalkeeper coach), uba la pynpaw ba ka kynhun ka la ïalehkai bha naduh ba sdang kane ka lympung, wat la ha ka semi-final ka Lajong ka la hap ban rai ïa ka jingjop haduh ka tie-breaker.
Ka Mawlai ka la shem ïa kajuh ka jingïakynduh, ha kaba ka la jop ha ki jingïalehkai group bad ruh ha ka quarter final ha shwa ba kan jop ïa ka Ladthadlaboh ha ka semi final.
“Ha ka aïom ba la lah ngim shym la lah ban rung sha ka phainal hynrei mynta u snem ka kynhun jong ngi ka la pynkhreh bha bad ngi la pynkhreh ban ïakhun pyrshah ïa ka kynhun kaba khlaiñ bha,” la ong u Teibor. “Ki nongialehkai baroh ki long kiba koit ba khiah bad baroh ki thrang eh ban ïalehkai bha na ka bynta ban wanrah burom ïa ka shnong Mawlai jong ngi.”
U rangïalehkai uba la ïoh thep kol pyrshah ïa ka Ladthadlaboh bad Player of the Match u dei u Damanbhalang Chyne, uba la donlang ruh ha kane ka jingïalang bad ki nongthoh khubor ha kaba u la pynpaw, “Ngi la pynkhreh bha bad u coach Bah Hering Shangpliang u la don shibun ka jingshemphang bad u la ïalam ïa ngi bad ngi tip ba ngi hap ban ïalehkai bha pyrshah ïa kawei na ki kynhun ba kynsai na ka Jylla.”
Ïa ki tiket na ka bynta ki paidbah ‘riew ieit phutbol lah ban ïoh na katei ka stadium bad ïa ka jingïalehkai lah ban ïohi ruh lyngba ka app jong ka Hello Meghalaya.