
Nongstoiñ, Rymphang 02
Ka kynhun ïalehkai jong ka Mawlangdep, Mawkynbat SC, SSS Sohparu SC bad ka Laitkseh SC ki la ïoh jingjop ha ka Third Division jong ka lympung ïalehkai NDSA Premier League Football Tournament 2024-25 ba la pynlong da ka Nongstoiñ District Sports Association (NDSA).
Ha katei ka jingïakhun kaba la long ha ka Sngi Saitjaiñ ha madan NDSA, Nongpyndeng, ka Mawlangdep ka la pynliem noh ïa ka Mawïawmah 3-1 kol. Kumjuh ka Mawkynbat SC ka la jop da 1-0 kol ïa ka Langdait SC, ka SSS Sohparu SC pat ka la pynliem noh da 2-0 kol ïa ka Nondein bad ka Laitkseh ka la pynjem khnap ïa ka Mawthengrynga da liem koh da 7-0 kol.
Haba phai pat sha ka Second Division, ka kynhun ïalehkai jong ka Wahdihbah FT ka la poi sha ka jingïakhaid mar 1-1 kol bad ka Dommawlieh FC, katba ka Dommawlien ka la pynliem noh da 2-1 kol ïa ka Lumshyiap SC.
Katkum ka prokram ba la pynbeit ka lympung ïalehkai super Division jong ka NDSA Premier League Football Tournament 2024-25 kan sdang ha ka 4 tarik mynta u bnai hapdeng ka Khliehmawlieh YCC pyrshah ïa ka Nongstoiñ FT ha madan New Nongstoiñ.