
Shillong, Rymphang 02
Ka lympung ïalehkai Second Division Shillong Cricket League 2024-25 ba la pynïaid da ka Shillong Cricket Association, ka la nangjam shaphrang ha kaba ka Sportive Junior bad ka NWCC ki la ïoh jingjop ha ka Sngi U Blei ha madam Urkaliar, Shillong.
Ha kane ka jingïakhun ka Sportive Junior ka la pynliem noh ïa ka Metallica Rising. Ka Metallica Rising ka la shimti ban tied nyngkong ha kaba ka la ïoh 70 run bad shah pynhap 10 wiket ha ki 16.5 over. U Jaspal Singh u la tied 16 run na ki 22 bol. Katba u Kishan Das u la shim 5 wiket bad 2 wiket da u Pawan Kumar Ram na ka bynta ka Sportive Junior.
Haba wan shimti ïa ka pali kaba ar, ka Sportive Junior ka la lah ban kynjoh sha ka thong da kaba ïoh 72 run bad shah pynhap 2 wiket ha ki 6 over. U Akash Purkhayastha u la tied 35 run na ki 18 bol bad u Joydip Shill u la ïoh 23 run na ki 12 bol. Katba u Rahul Barau u la shim 2 wiket na ka bynta ka Metallica. Ïa ka nam Player of the Match la ïohpdiang da u Kishan Das.
Haba phai sha kawei pat ka jingïakhun ba ar, ka NWCC ka la jop da 1 wiket ïa ka Masonic. Ka Masonic kaba la kam trai ban tied nyngkong, ka la ïoh 143 run bad shah pynhap 9 wket ha ki 20 over. U Niraj Rana u la tied 38 run na ki 16 bol bad u Bunny Sharma u la ïoh 23 run na ki 9 bol. Katba u Sanjiv Ghosh u la shim 4 wiket bad 2 wiket da u Pankaj Chanda na ka bynta ka NWCC.
Haba wan shimti ïa ka pali ba ar, ka NWCC ka la kynjoh sha ka thong da kaba ïoh 146 run bad shah pynhap 9 wiket. U Prasanjit Chanda u la tied 30 run na ki 21 bol bad u Sonu Rynjah u la ïoh 29 run na ki 31 bol. Katba u Bunny Sharma u la shim 3 wiket na ka bynta ka Masonic Ïa ka nam Player of the Match la ïohpdiang da u Sanjiv.