La plie ïa ka jaka mane Hindu ba heh tam duh ha South Africa

Ka BAPS ka la pynbna ia katei ka jakamane kum ka jaka lehniam Hindu kaba heh tam ha ka thaiñ Shatei Lam Mihngi hapoh jong katei ka ri.

Johannesburg, Rymphang:

Katkum ki khubor, la ong ba ka South Africa ha kane ka por ka la lah ban plie ia ka jakamane Hindu kaba heh tam ha ka thaiñ Shatei Lam Mihngi ba la plie hapoh ka nongbah Johannesburg ha ka Sngi U Blei ha kaba da ki phew ngut ki riewngeit Hindu ki la leit ban iashim bynta ha katei ka jinglehniam ban rakhe ia katei ka sngi kaba khraw.

Watla tang ar na ka shispah ki nong South Africa ki pynithuh ïalade kum ki Hindu, hynrei ka dei ka jaitbynriew kaba la heh-paid bha hapdeng ki nong India ha katei ka ri.

Kumta la ong ba ki paidbah nongmane ki la leit poi naduh shwa ban shai ka sngi ban iashim bynta ha ki jinglehniam pynkyntang, ia kaba la ialam da u nongialam jong ka Bochasanwasi Akshar Purushottam Swaminarayan Sanstha (BAPS) u Mahant Swami Maharaj, 92 snem ka rta, u ba la wan khnang kyrpang naduh India na ka bynta katei ka sngi.

U Hemang Desai u la ong ba ka BAPS ka kwah ba katei ka jaka kan long ruh ka jaka ba kyrpang ban ioh ban sakhi ia ki rukom im bad ki jinghikai kiba rim- ba jah ba la hikai bad aiti da ki longshuwa- manshuwa na India.

Ka BAPS ka la pynbna ia katei ka jakamane kum ka jaka lehniam Hindu kaba heh tam ha ka thaiñ Shatei Lam Mihngi hapoh jong katei ka ri.

Kumta ruh la ong ba shwa ban plie ia katei ka jakamane ha katei ka sngi, da ki phew ngut ki nongialam ‘Monk’ ki la ïalam ïa ka jingïaid paidbah ha ka Nagar Yatra ha Johannesburg ha ka Sngi Saitjaiñ ha kaba la pyni ïa ki jingrwai jingmane da ki kynhun ïaid kjat bad ki nongshad.

Ia katei ka jaka la jied namar ka jingdon bun ki nongbud kiba la don lypa ha Johannesburg bad kumjuh ruh  ka jingwan bun jong ki jaitbynriew Hindu kiba nabar ri kiba da leit rung khnang sha katei ka thaiñ na kiwei pat ki bynta jong ka ri.

Namarkata ruh la ong ba katei ka jakamane kan pynlong ia ki jinghikai bapher- bapher ha ka rukom pynwan dur, ka shad, ka ktien bad ka jingngeit ha ki katto katne ki ktien ba la kren da ki paidbah ha South Africa.