Shillong, Rymphang 03
U ‘rang siatkhnam ka Jylla u Devraj Mohapa-tra u la hap ban wanphai noh sha la ïing hadien ba um shym la ïoh ban rung hapoh ka thup kaba 32 jong ki nongsiat ba kynsai ha ka 38th National Games kaba dang ïaid mynta ha Uttarakhand.
Kat kum ki tyllong khubor ba la ïoh lum la ong ba u Devraj uba la long tang marwei napdeng ki nongsiatkhnam ban mihkhmat ïa ka Jylla sha katei ka lympung ha ka recurve, u la wan ha ka kyrdan 46 bad um shym la ïoh rung hapoh ka thup kaba 32. Kumta une ‘rangïalehkai u la duh noh ïa ka lad ban bteng ha kane ka jingïakhun bad u la hap ban lum noh la ki tum ki tam ban wanphai noh sha la ïing.
Kum ban shu pynkynmaw kane ka dei ka sien kaba nyngkong ïa u Devraj ban ïashim bynta ha katei ka lympung.
Te kumta utei u rangïalehkai ka Jylla un pynkhreh ban leit shim bynta sa ha ka Junior National Archery Championship 2025 ka ban long ha Bolpur naduh ka 9 tarik mynta u bnai.
Kum ban shu kdew u Devraj u la lah ban pynpaw ïa ka jingtbit ha ka 6th Meghalaya Games kaba la kut dangshen ha West Jaiñtia Hills, ha kaba u la khur kawei ka takma ksiar bad ka takma rupa.
