Yn pyndep don burom ïa ka met u nongïalam ka Hezbollah ha ka 23 Rymphang

Namarkata, la ong ba katei ka kynhun kan leh burom khatduh ia u Safieddine ruh ha katei hi kajuh ka sngi.

Beirut, Rymphang:

Ki heh ka Hezbollah ki la pyntip ba kin sa pynlong ia ka jingleh burom khatduh na ka bynta u nong-ialam ba ha klhieh jongka- u Hassan Nasrallah, uba la khlad ha u Nailur ha ka jingleit thombor jong ka Israel bad ia katei ka sngi la pynbeit ban pynlong ha ka 23 tarik u Rymphang katkum ka jingiathuh jong u nongialam ba mynta jong katei ka kynhun – u Naim Qassem ha ka Sngi U Blei.

La ong ruh ba ka long ka sien ba nyngkong eh ia u Qassem ba un pyntikna ba katei ka kynhun ka la dep thung ia u Hashem Safieddine kum u nongmih bujli ha ka jaka jong u Nasrallah uba la khlad noh ha ka jingleit thombor jong ka Israel ha u Risaw mynshem snem.

Namarkata, la ong ba katei ka kynhun kan leh burom khatduh ia u Safieddine ruh ha katei hi kajuh ka sngi.

Kumta la ong ba ia u Safieddine yn tep pyndonburom kum u ‘Secre-tary-General’ lane u nongialam ka Hezbollah, namar ba katei ka kynhun ka la jied ia u His Eminence Sayyed Hashem kum u ‘Secretary-General’ hynrei u la kyllon iap noh hapdeng ka jingiakhun bad ki shipai Israel ha ka 3 tarik u Lber, shisngi ne arsngi shwa ban pynbna ia u.

Yn tep ia u Nasrallah ha ki rud jong ka nongbah Beirut ha kawei ka jaka kaba katei ka kynhun ka la dep jied kyrpang hapdeng ka surok kad liengsuin kaba rim bad kaba thymmai. Katba ia u Safieddine pat yn tep ha ka shnong trai jong u ha Deir Qanun kaba don sha ka phang Shathie jong ka Lebanon.