Shillong, Rymphang 05
Ka shi kol ba la thep da u Donboklang Majaw ka la lah ban pynurlong ïa ka Nongthymmai SC ban pynïakhaid mar 1-1 kol pyrshah ïa ka Shillong Lajong FC ha ka OC Blue Shillong Premier League 2024 ha ka Sngi Balang ha SSA Stadium kaba ha First Ground, Polo.
Wat la u Rimankhraw Kharum-nuid (69) u la ïoh ban thep kol na ka bynta ka Lajong, hynrei ka Nong-thymmai ka la lah ban pynïakhaid lyngba u Donboklang (83) na ka bynta ban ïasam mar shi poiñ.
Kane ka jingïakhaid ka la pynlong ïa ka Lajong ba kan duna 2 poiñ ïa ka Mawlai SC, kaba dang lamkhmat ha kane ka lympung bad kaba dang ap khmih lynti ban long biang ka lahduh lai sien lynter ha kane ka lympung.
Katba ka Nongthymmai ka dang don ha ka kyrdan shatrai ryngkat 8 poiñ, hynrei ka jingïalehkai ba shlur jong ka mynta ka sngi ka la long ka jingai mynsiem shibun ïa ki nongïalehkai na ka bynta ban pynkut shah rem kaba hynriew sien lynter.
Ka SLFC ka la ïoh ïa ki kabu ksiar ha ka kylla step, hynrei kam shym la lah ban pynurlong wat la ka donkam eh ban ïoh jingjop ha kane ka jingïakhun.
Kata ka mynsiem ka la long kumba ka la jah noh ha ka kylla miet bad ha kawei pat ka liang, ka Nongthymmai ka la sdang ban pyni ïa ka jingïakhun kaba tyngeh wat la kam shym la lah ban pynpra ïa ka bynta kaba shadien jong ka Lajong.
Nangta, ka jingpyrshang da u Samchaphrang Lato ha ka liang ka diang ka la hap sha ka jaka kaba lait jong ka box bad ka Nongthymmai kam shym la lah ban leh eiei bad kane ka la pynlong ïa u Rimankhraw ban thep kol.
Kane ka jingkmen ki rangïaleh-kai ka Lajong kam shym la neh slem, namar ka Nongthymmai ka la ïoh ban rah ïa ka bol sha box lyngba u Abhay Chettri, hynrei u Donboklang u la lah ban pynurlong ban pynphai kylla.
Hadien kane ka jingïakhaid, ka Lajong ka la hap ban wad biang ïa ki lad ki lynti kumno ban ïoh thep kol biang, hynrei ka jingïakhun tyngeh u Dlessing Lyngdoh bad u nongapkol u Akash Thapa ka la pynlong ban khanglad ïa u Babysunday Marngar jong ka Lajong na ka jingshah thep kol.
Ha ka Sngi Palei kin don ar tylli ki jingïalehkai ha kane ka lympung hapdeng ka Langsning FC pyrshah ïa ka Mawlai ha ka por 11 baje mynstep bad ka Sawmer SC ïa ka Rangdajied United FC ha ka por 2:30 nohphai sngi.
