Shillong, Rymphang 06
U rangïalehkai phutbol ka Jylla, Redeem Tlang uba ïalehkai mynta na ka North East United FC, u la pynpaw ba ka jingwan jong ka lympung ïalehkai Indian Super League ka long shisha ka jingkyrkhu ïa ka Jylla.
Haba pynpaw ha ki lad pathai khubor shisngi shwa ba ka NEUFC kan ïakhun pyrshah ïa ka Mumbai City FC ha kane ka JN Stadium Polo, u Redeem u la ong ruh ba ka burom kaba khraw tam ruh wat ïa u paidbah jong kane ka Jylla namar kin ïoh ban sakhi ïa ki lai tylli ki jingïalehkai jong ka ISL.
U Redeem u la kam ba kum u rangïalehkai, ha ka jingim ka jingtynjuh ka ju ïai don beit ha kano-kano ka liang kampher wat la ka dei ha ka jingpule ne ha kano-kano ka liang, hynrei u kam pat ba ïalade shimet, u long beit uba la pynkhreh bad kyrmen ba kane ka jingpynkhreh kan da poi sha ka thong.
Haba phai sha ka kynhun ïalehkai ka Mumbai, u Redeem u la kam ba ka dei ka kynhun kaba khlaiñ bad kano-kano ka kynhun kaba ïakhun ha ka ISL kam dei satia kaba tlot, hynrei kaba kut kan shong pat ha ka jinglah ban thep kol bad ïoh ïa ka jingjop.
Haba ïadei pat bad ka madan ïalehkai JN Stadium ha kane ka nongbah, u Redeem u pynpaw ba ka long kaba biang bha bad ka la ïapher shibun na ki por mynshwa.
Te kumta u Redeem u la kyrpad ïa ki paidbah ‘riew ieit phutbol ba kin ïa mih paidbah ban ai jingkyrshan na ka bynta ka NEUFC namar kum ka kynhun ka donkam ruh ïa kane ka bynta.
