Shillong, Rymphang 07
Ka NorthEast United FC ka la mad ïa ka jingshah rem ha ka Mumbai City FC da 2-0 kol ha ka lympung ïalehkai Indian Super League (ISL) ha ka Sngi Thohdieng ha Jawaharlal Nehru kaba ha Polo, Shillong.
Kane ka la wan urlong lyngba ki kol na u Bipin Singh Thounaojam bad u Lallianzuala Chhangte na ka bynta ban pynlong ïa ka City ban jam sha ka kyrdan basaw, katba NEUFC ka la hiar sha ka kyrdan basan.
Kane ka long ka jing-ïakhun kaba nyngkong eh ba ka NEUFC ka la wan ban pynlong ïa ki jingïalehkai ha la ïing (home matches) ha kane ka nongbah hadien ba ka la ïohi ïa ka jingwan tuid ki paidbah kane ka Jylla ban sakhi ïa ki jingïa-lehkai jong ka Durand Cup kiba la long mynshem snem.
Haba phai sha kane ka jingïakhun, baroh ar ki kynhun ki la pyrshang ban ïakhun tyngeh naduh kaba sdang hynrei kim shym la lah ban pynurlong. Ha shwa ban kut ka jingïalehkai jong ka kylla step, ka NEUFC ka la shah thep shi kol ha ka Mumbai lyngba u rangïalehkai barim ka Shillong Lajong u Bipin Singh Thounaojam (41).
Wat hapdeng kane ka jingshah thep kol, pynban ki rangïalehkai ka NEUFC ki la pyrshang ban ïakhun tyngeh na ka bynta ban ïoh pynïakhaid khamtam lyngba ka jingkyrshan ki paidbah kane ka nongbah. Wat hapdeng kane ka jingïa-khun, ka Mumbai ka la lah ban pynurlong na ka bynta ban thep biang ïa ka kol ba ar ha shwa ban wai lyngba u Lallianzuala Chhangte (90+2) na ka bynta ban ïoh jingjop shisyndon.
Da kane ka jingjop ka Mumbai City ka la jam sha ka kyrdan basaw ryngkat 31 poiñ na ki 19 sien ïakhun, katba ka NEUFC ka dang ïai sah 29 poiñ na 20 sien ïakhun.
Te kumta ka NorthEast United kan leit sha Jamshedpur na ka bynta ban pynkhreh ïa ka jingïalehkai shabar na la ïing pyrshah ïa ka Jamshedpur FC ka ban long ha ka 13 tarik mynta u bnai.
